Nang-ambush maoy napatay

CEBU, Philippines — Usa ka wanted tungod sa kaso sa ilegal nga drugas nga dili gustong magpadakop nga buhi napatay sa kapolisan human niini gikatahong giunhan pinaagi sa pag-ambush ang mga polis nga mo-serve unta sa iyang warrant of arrest diha sa ilang pinuy-anan sa barangay Jampang sa lungsod sa Argao kagahapon sa kaadlawon, Septiyembre 13,2024.

Ang kapolisan mosikop unta ni Joeraldine Bajenting Gevana alyas Jirdin pinasikad sa warrant of arrest sa kasong kalapasan sa Section 5, Article II sa Republic Act 9165 apan gikatahong nakigpinusilay hinuon kini ug iyang mga kaubanan ngadto sa mga polis.

Nagkanayon si Police Major Janus Giangan, hepe sa Argao Police Station nakahibalo ang grupo sa suspek sa sakyanang gigamit sa mga polis sa mga operasyon maong nanganaog silang daan ug gipauna ang sakyanan.

Dangtan pila ka gutlo gipaulanan matud pa og bala ang sakyanan hinungdan sa pagkaangol sa usa sa mga polis ug nabuak ang samin sa bintana sa passenger side niini.

Nagtuo sab ang suspek ug mga kaubanan nga naglingkod sa maong pwesto si Giangan mao nga katulo kini gipabuthan sa gituohang sniper.

"Nag-expect nami ato kay ana man gyud na kay last month pa ila namang giplanuhan nga ila ming ambuson or patyon, so nag expect mi, siyempre wise mi nilakaw nami sa kilid, ninaog mi daan," sigon ni Giangan.

Nisunod ang hapit duh aka oras nga sinukliay og bala tali sa mga polis ug gibanabanang dili momenus napulo ka miyembro sa grupo ni Gevana.

Nidagan matod pa ang suspect sa hideout niini nga usa ka underground tunnel  apan nasundan kini sa kapulisan ug napusilan sa lawas nga maoy rason sa iyang kamatayon.    IBM BANAT NEWS