Hepe sa tanod gipusil nasab

CEBU, Philippines — Sa ikaduhang higayon, gipusil nasab ang hepe sa barangay tanod sa Candulawan, Dakbayan sa Talisay niadtong Huwebes sa gabii.

Ang biktima mao si Fidel Torion Sr., 42 anyos nga nagpuyo sa maong dapit. Samtang ang suspek mao si Jeron Monterde alyas Tiyan, nga taga sitio Iba, Barangay Lagtang sa nahisgutang Syudad.

Sa inisyal nga imbestigasyon sa kapolisan nasuta nga nagbarog lang sa gawas sa barangay hall ang biktima sa dihang kalit nga naabot ang suspek ug gipusil siya niini sa makadaghang higayon.

Ang suspek nisibat samtang gidala sa tambalanan ang biktima nga nakaangkon og samad sa iyang ulo.

Niadtong Agusto 10 ning tuiga, gipusil si Torion sa mao gihapon nga suspetsado apan wala makaduot ang bala sa dughan niini.

Gipasakaan og kaso si alyas Tiyan nga frustrated murder niadtong higayona pero padayon gihapon ang bahad niini.

Nasuko si alyas Tiyan sa mga barangay tanod human usa sa ilang mga kauban ang nakapatay sa igsuon niini ug mibahad kining manimalos kanila.— IBM BANAT NEWS