Pagduso og COC gikatakda sa Oktubre

CEBU, Philippines — Gikatakda karong Oktubre 1 hangtud sa 8, 2024 ang ang pagduso sa certificate of candidacy (COC) sa mga magpapili sa umaabot nga eleksiyon sa sunod tuig. Ang Commission on Election (Comelec) nipahinumdom sa mga molansar sa mga rekisitos sa pagduso sa ilang COC.

Sa opisyales nga kandidato gawas sa COC apil usab sa isumiter ngadto sa Comelec ang Certificate of Nomination and Acceptance sa mga kandidato nga adunay partido, alang sa substitution tungod sa withdrawal sa COC.

Sa mga partylist, kinahanglang adunay Certificate of Nomination ug Certificate of Acceptance of Nomination (CON-CAN), listahan sa mga nominees sa partido ug affidavit sa kwalipikasyon sa nominees.

Alang sa mga lokal nga kandidato kinahanglan nga rehistradong botante kini sa barangay, munisipyo ug lalawigan kon asa gusto kini magpapili; kinahanglan usab nga residente kini sa maong lugar sa dili mo menos sa usa ka tuig sa dili pa ang adlaw sa eleksiyon ug kinahangan usab nga kahibalo kini mosulat ug mobasa sa Pilipino o mga lokal nga pinulongan.

Ang mga posisyon nga pilian sa lokal mao ang gobernador, bise gobernador, bokal, mayor, bise mayor, ug konsheal sa lungsod o sa siyudad. Kinahanglan nga dili moubos sa 23-anyos ang edad sa maong kandidato sa dili pa ang eleksiyon.

Ang national and local elections ipahigayon kini sa Mayo 12, 2025.

Sa laing bahin, si Mayor Gerald Anthony “Samsam” Gullas, Jr. nipadayag nga pagka-mayor gihapon sa Dakbayan sa Talisay ang iyang daganan nga posisyon sa sunod tuig nga eleksiyon.

Giklaro kini ni Gullas human sa mga nanggawas nga hungihong nga magpapili kini sa laing posisyon. “Mayor gyud ko. I will finish my term (if ka daog)”, ni Gullas pa.

Matud ni Gullas nga kadtong nagpalakaw nga siya dili na modagan pagkamayor mao kadtong mga tawo nga gusto siya nga papahawaon na sa Dakbayan sa Talisay.

Lakip sa mga nikatap nga hungihong nga si Konsehal Eduardo “Digul” Gullas III mao usab ang giingong magpapiling mayor sa siyudad sa sunod tuig nga eleksiyon. BDB BANAT NEWS