Garcia nimando pagsikop sa mga kawatan

CEBU, Philippines — Si Acting Cebu City Mayor Raymond Alvin Garcia nimando sa Cebu City Police Office nga pangitaon ug pasakaan og kaso ang mga naglangkub sa grupo sa mga kawatan.

Nakuha sa footage sa closed circuit television (CCTV) ang pagkuot sa usa sa mga kawatan sa cellphone gikan sa bag sa biktima niadtong Miyerkules sa hapon diha sa dagkotan sulod sa Basilica Minore del Santo Niño.

Human sa ilang gihimo nag-iyahay og pagpanglakaw ang mga kawatan gawas sa Basilica.

Nailhan sa kapolisan ang lima sa unom ka kawatan kinsa uban niini napasakaan na og kaso kaniadto.

Makigtagbo si Garcia kang Police Colonel Antonietto Cañete acting city director sa Cebu City Police Office (CCPO) aron tukion ang petty crimes ug uban pa nga kalabotan sa peace and order sa siyudad.

Dugang ni Garcia nga iyaha usab nga mandoan si Canñete sa pagpadala kaniya og report kalabot sa insidente sa pagpanguot ug sa pagpasaka sa tukmang kaso batok sa mga nalambigit niini. BDB BANAT NEWS