Mga residente sa Canlaon City gipabakwit
CEBU, Philippines — Hugot nga gibantayan sa Department of Social Welfare and Development Field Office Central Visayas ang nagpadayon nga preemptive evacuation sa Canlaon City taliwala sa volcanic unrest sa Mount Kanlaon sa Negros Oriental.
Base sa taho ngadto kang DSWD Secretary Rex Gatchalian, si Central Visayas Regional Director Shalaine Marie Lucero nagkanayon nga alas 10:00 sa gabii niadtong Martes niabot sa 88 ka pamilya o 248 ka indibidwal ang gipabakwit ug gipahiluna ngadto sa tulo ka managlahing public high school.
Sa Barangay Masulog, 65 ka pamilya o 204 ka indibidwal ang namakwit ngadto sa Masulog High School samtang sa Barangay Malaiba, 10 ka pamilya o 31 ka indibidwal ang nipasilong ngadto sa Malaiba Elementary School samtang tulo ka pamilya o 13 ka indibidwal gikan sa Barangay Pula ang nipabakwit ngadto sa Pula Elementary School. Matud ni Lucero nga alerto na ang quick response team (QRT) sa Isla sa Negros.
Taliwala sa pagsaka sa gidaghanon sa mga natala nga seismic activities sa Mt. Kanlaon, ang DSWD nipasalig nga ang ahensiya andam nga motabang sa Canlaon City local government unit (LGU) sa disaster response ug relief operation.
Si Lucero nagkanayon nga ang iyang rehiyonal nga buhatan nakigtambayayong sa LGU sa Canlaon alang sa plano sa pagresponde sa emerhensiya diin ang mga session sa pag-refresh karon gihimo uban sa mga miyembro sa QRT nga ipakatap sa lugar kong gikinahanglan.
Sa laing bahin, si Carmelo Nochete, DSWD FO 6-Western Visayas regional director nitaho usab kang Gatchalian nga ang ilang FO adunay kinatibuk-ang 32,990 ka kahon sa FFPs sa Bacolod City, samtang adunay kapin sa 37,000 ka food packs nga gibutang sa mga bodega sa nagkalain-laing lokalidad sa palibot sa Negros Occidental.
Nasayran nga sa Canlaon City, niabot ngadto sa 7,000 ka kahon sa FFPs ang gibutang gawas sa mga dili pagkaon sama sa hygiene, family kits, gamit sa kusina ug sleeping kits ingon man modular tent.
Samtang sa Negros Oriental, niabot sa 14,000 ka FFPs ang napundo sa bodega sa DSWD sa Dumaguete City ug 3,400 ka kahon sa FFPs ang anaa sa storage facility sa maong ahensiya sa Lungsod sa Vallehermoso. (BANAT NEWS)
- Latest
