Mga OFW makabaton og dugang benepisyo sa SSS

CEBU, Philippines — Nigama ang Department of Migrant Workers (DMW) ug Social Security System (SSS) og Memorandum of Understanding (MOU) aron mapausbaw ang access sa social security ug mga benepisyo alang sa mga Overseas Filipino Workers (OFWs) ug ilang mga pamilya.

Matud ni Migrant Workers Secretary Hans Leo Cacdac nga ang mga OFWs ug ilang pamilya uhaw sa impormasyon kun unsaon paghimo og maalamon nga desisyon alang sa dugang social protection ug financial freedom.

Tungod niana, mapasalamaton siya niining panag-uban sa SSS sa pagtabang kanila nga makab-ot ang usa ka financially ug socially secured nga kinabuhi, ilabi na sa ilang reintegration.

Samtang, ang Presidente ug CEO sa SSS nga si Rolando Macasaet miingon nga gisubli sa SSS ang ilang pasalig sa pagtabang sa mga OFW ug ilang mga pamilya pinaagi sa sayon ug kasaligan nga mga programa sa social security.

Saysay ni Macasaet nga kaniadto ang OFW membership sa SSS kay usa ra ka milyon apan karon aduna nay upat ngadto sa lima ka milyon nga miyembro, nga nahimong posible pinaagi sa ilang dako nga membership campaigns. Dugang pa niya nga ang SSS naghinam-hinam sa pag-welcome sa dugang OFWs isip miyembro.

Pinaagi niining panagtambayayong, ang mga OFW ug ilang mga pamilya makaangkon og mas maayong access sa social safety nets para sa pagretiro, kawalay trabaho, ug uban pang contingencies.

Dugang niana, ang duha ka ahensya ug ang uban nga stakeholders magsuhid usab sa mga

posibleng kalamboan sa mga programa sa savings ug provident fund nga gipahaum sa tukma nga panginahanglan sa mga OFW. (BANAT NEWS)