Lima kilong shabu nasakmit

CEBU, Philippines — Usa ka 42-anyos nga lalake ang nadakpan sa mga otoridad human kini nakuhaan og lima ka kilo nga gituohang shabu atol sa buy-bust operation diha sa Binayran Road, Barangay Dampas, Tagbilaran City, Probinsya sa Bohol alas 9 sa gabii sa adlaw'ng Lunes, Septyembre 9, 2024.

Ang operasyon gilusad sa mga sakop sa Philippine Drug Enforcement Agency (PDEA)-7, Naval Forces Central, Philippine Maritime Police ug Bohol Provincial Drug Enforcement Unit  nga niresulta sa pagkasikop ni Roberto Tiro, wala'y trabaho ug nagpuyo sa maong siyudad.

Nakuhaan ang suspetsado og lima ka vacuum-sealed packs nga dunay sulod nga gituohang shabu nga nitimbang og 5,000 gramos o lima ka kilo. Giingong mokantidad kini og P34 milyones, buy-bust money, usa ka cellphone ug usa ka awto nga sedan.

Ang suspek gisugdan sa pagpaniid human dunay nadakpan nga 17-anyos nga batan-ong taga Bohol diha sa Barangay Marigondon, Lapu-Lapu City nga nakuhaan og duha ka kilong shabu sa miaging semana.

Nasuta sa mga operatiba nga makabaligya si Tiro og duha ngadto sa tulo ka kilo nga shabu kada semana apan bag-o palang kining nahibaw-an sa mga otoridad. Nasuta nga uyoan sa maong 17-anyos si Tiro. Kasong kalapasan sa Section 5 ug 11, Article II sa Republic Act 9165 ang ipasaka batok sa suspetsado.

Sa pikas bahin, 269 ka mga tawo ang nadakpan sa kapulisan sa Police Regional Office(PRO)-7 nga nakalapas sa nagkalain-laing krimen niadtong Septiyembre 6, 2024.  Ang 94 niini  ang nalambigit sa ilegal nga drugas ug 430.90 gramong shabu nga nagkantidad og P3 milyones ingon man marijuana nga nagkantidad og dul-an P5,000 ang nasakmit.--   IBM BANAT NEWS