Mga establisamento pabutangon og CCTV cameras

CEBU, Philippines — Ang mga opisyales sa Barangay Poblacion, Dakbayan sa Talisay niawhag sa mga mga magpapatigayon nga mag instalar og Closed Circuit Television (CCTV) camera sa ilang mga establisemento  human sa pagbalik sa mga panghitabo nga pagpanulis.

Si Konsehal Jefferson Seguerra, chairman sa committee on peace and order sa barangay nibutyag nga moduso siya og resolusyon aron sa pagawhag sa mga magpapatigayon nga mogahin og pundo aron magbutang og CCTV camera sa ilang edipisyo.

Matud pa ni Seguerra nga iyang ordinansahon, himuon na unya kining rekisitos sa pagkuha og business permit nga ang tumong mao ang pagprotektar sa mga patigayon ug sa mga naa sa palibot niini.

Niadtong miaging semana, usa ka motorista nga taga lungsod sa Minglanilla ang gitiunan og armas dayon gikuha ang iyang motorsiklo. Ang magtiayon sab ug batan-on nga ilang kuyog ang gipangtionan og armas dayon kuha sa ilang mga cellphone.

Hinuon nasikop na ang naghimo sa krimen atol sa follow up operation. Para sa kapolisan makatabang og dako sa imbestigasyon kun dunay CCTV camera sa lugar sa mga krimen.

Carnapping

Ning bag-o, nasikop sa Highway Patrol Group-7 didto sa Dumaguete City ang usa ka 18-anyos nga lalaki nga giingong maoy suspek sa upat ka pagpangawat og motor sa nagkalain-laing lugar sa Negros Oriental sa miaging mga buwan.

Ang suspetsado mao si alyas Kulot, 18 anyos, nagpuyo sa Barangay San Antonio, Lungsod sa Sibulan, Negros Oriental.  Sagad sa mga gibiktima iyaha rang mga kaila, usa sa mga biktima giingong gipakatulog pa sa suspek sa ilang panimalay apan pagkabuntag nawagtang na ang motorsiklo niini.

Pinaagi sa CCTV footage nga nakuha sa HPG-7 nailhan kini, nadakpan ug nabawi ang motor.

"Ang uban na recover nato abandoned na basically ilaha sigurong ibaligya ra within the area sa Negros," sigon ni Police Lieutenant Colonel Wilbert Parilla, Regional Chief sa HPG-7.

Gisubay karon sa HPG-7 kun dunay laing mga kauban ang suspek kun kinsa ang tigpalit sa mga kinawat nga mga motor.

Base sa datos sa HPG-7 ang carnapping incidents sa Central Visayas sa tuig 2023, pito ka 4-wheeled  vehicles ug 88 ka motorsiklo ang gikawat ug ning tuiga lang tulo ka sakyanan ug 43 ka motor ang natala ang gi-karnap.

Patrolcars

Sa pikas bahin, ang Police Regional Office(PRO)-7 miapud-apod og mga motorsiklo ug patrolcars para sa kapolisan sa nagkadaiyang probinsya ubos sa hurisdiksyon niini.

Si PRO-7 Regional Director Brigadier General Anthony Aberin pormal nga nitunol sa 21 ka mga 150 cc dirt bikes ug tulo ka PNP light transport Toyota Innova  para sa Police Provincial Offices apil na ang Bohol, Cebu ug Negros Oriental ug command group.

 Giawhag ni Aberin ang mga nakadawat sa bag-ong motorsiklo ug sakyanan nga ampingan kini subay na sa mandato sa kapulisan.— IBM BANAT NEWS