13 ka balay naugdaw tungod sa pagpaaso kontra lamok

CEBU, Philippines — Naugdaw ang 13 ka balay apil na ang usa ka kapilya  human miulbo ang sunog sa Purok 5 Orchids Sitio Bangkerohan, Barangay Tayud, Lungsod sa Consolacion, alas 7 sa gabie sa adlaw'ng Lunes.

Ang maong sunog nibilin og danyos nga P250 mil sumala pa sa kabomberohan sa Lungsod sa Consolacion.  Niabot og second alarm ang sunog ug hingpit nga napawong alas 8:27 na sa gabii.

Sa pakighinabi sa DYSS Super Radyo Cebu sa usa ka Dondon Furog, tag-iya sa balay nga giingong didto gasugod ang kalayo,  kini miangkon nga sa wala pa nahitabo ang insidente gisugo niini iyahang anak nga 15-anyos sa pagduslit sa egg trays aron pang-abog sa lamok.

Kahinumdoman nga ang Central Visayas nakatala og sobra 15 ka mga kaso sa dengue karong tuiga.

Sigon ni Furog nga gibutang niya ang sinunog nga egg trays sa ilang kasilyas aron paasohan didto ug pagkahuman iyaha kining gilabay ilawom sa ilang balay. Ang balay ni Furog naa gipabarog sa dagat sa maong dapit.

Human niini, nanumbalay siya aron motan-aw og balita sa TV.

"Akong gibutang sa may bato sa may CR ba katong may semento niya pagkagamay niya akong gihulog mao nato wala nako kabantay unsay gikaon ato nga kayo," sigon ni Furog.

Matod ni Furog nga wala sila'y naluwas nga gamit bisan mga dokumento man lang.

Si Tayud Barangay Captain Fe Cuyos sa iyang bahin miapelar og hinabang sa publiko alang sa mga nabiktima sa sunog. -- Rowena Capistrano ug Romeo Limpangog/IBM BANAT NEWS