Awto nalimbuwad, unom naangol

CEBU, Philippines — Unom ka mga call center agents ang naangol human malimbuwad ang awto nga ilang gisakyan diha sa Mananga Bridge, sa N. Bacalso Avenue, Barangay Lawaan Dos, Dakbayan sa Talisay niadtong Lunes sa gabii.

Si Jonathan Tumulak, pangu sa City of Talisay-Traffic Operation Development Authority (CT-TODA) nagkanayon nga tulo ang babaye ug tulo ang lalaki ang mga biktima.

Matud pa ni Tumulak nga pulos kini sila mga batan-on nga naa sa pangidaron sa 20 anyos kapin ug kulang. Sigon pa niya nga gikan sa habagatan ang mga biktima nga paingon nang mopauli sa Syudad sa Sugbo. Gikaingon nga nag outing kini sila gumikan sa long weekend.

Apan sa pag-abot sa nahisgutang lugar nakatagpilaw ang drayber hinungdan nga naigo sa railings sa taytayan sa Mananga hangtud nga nalimbuwad.

Hinuon sa pagsusi sa mga sakop sa CT-TODA wala sila makatimaho nga nakainum og ilimnong makahubog ang drayber. Gidala sila sa tambalanan ug wala ra magrabehi sa hitabo nga disgrasya.—  IBM BANAT NEWS