CHR-7 nabalaka sa sexual advances sa magtutudlo ngadto sa mga estudyante

CEBU, Philippines — Nipadayag ang Commission on Human Rights (CHR)- 7 og kabalaka sa gikataho nga kaso sa giingong sexual advances sa usa ka magtutudlo ngadto sa duha ka menor de edad nga mga estudyante sa sakbayan sa Sugbo.

Gikataho nga ang duha ka lalaking biktima nga tinun-an sa grade 10 niangkon nga ang ilang magtutudlo nihangyo nga mohalok kanila ug motan-aw sa ilang abs.

Apan gibalibaran nila ang maong maestro hinungdan nga giingong nasuko kini ug gipaak ang 17-anyos nga biktima sa buko-buko ug ang 14-anyos nga biktima sa iyang tuong bukton.

Ug gumikan niini, gisaway sa CHR-7 ang bisan unsang porma sa sexual advances, dili angay nga pamatasan, o mga innuendo ilabi na kong gitumong ngadto sa mga bata ug anaa sa sulod sa mga institusyon sa pagkat-on diin ang kaluwasan ug pagsalig kinahanglan nga mopatigbabaw.

Matud sa CHR nga makapaalarma pa ang maong mga buhat kon apil na ang mga magtutudlo nga maoy gitugyanan sa pag-atiman ug edukasyon sa ilang mga tinun-an.

Subay niini, hingpit nga gipasalig sa CHR nga andam silang motabang sa mga biktima sa samang binuhatan ug sa ilang mga pamilya ug nag-awhag kanila sa pagkab-ot sa hustisya.

Samtang nipasiugda na og motu proprio investigation ang maong ahensiya ubos sa koordinasyon sa pamilya sa mga menor de edad nga biktima ug sa Philippine National Police (PNP)-7. BDB BANAT NEWS