Pinansiyal nga ayuda sa senior citizens gipanghatag na

CEBU, Philippines — Hingpit na nga nasugdan og pang-apod-apod ang pinansiyal nga hinabang sa mga senior citizen sa 80 ka barangay sa Dakbayan sa Sugbo niadtong Septiyembre 7, 2024.

Sayo pa, nisaad si Cebu City Acting Mayor Raymond Alvin Garcia nga makadawat ang 90,000 ka senior citizen sa ilang ayuda sa maong petsa.  Matud ni Garcia nga niuban siya sa maong pag-apod-apod aron masuta ang mga kahimtang sa senior citizens.

Gikalipay usab niya tungod kay mapasalamaton ang mga senior citizen sa paspas nga aksyon sa ilang hangyo kabahin sa ilang financial assistance.

Ug tungod kay nakaani kini og positibo nga mga komento gikan sa mga senior citizen nanghinaot si Garcia nga unta mamentinar matag quarter ang pang-apod-apod sa financial assistance alang kanila ug ihatag kini sa unang semana sa buwan.

Alang sa financial assistance sa mga persons with disability ipahigayon kini sa sunod semana human ipanghatag alang sa mga senior citizen.

Sa laing bahin, sutaon usab ni Garcia ang kabahin sa pagpanghatag og maintenance medicines gumikan kay nahunong na kini og pagpanghatag.

Nasayran usab ni Garcia nga human nga naundang pagpanghatag og maintenance medicines gikan sa kagamhanan tungod kay aduna nay mga barangay nga nangunay na lang og panghatag sa maintenance medicines apan limitado lang ang ilang nahatag.

Matud ni Garcia nga pagatan-awon usab niya ang budget alang sa pagpanghatag og maintenance medicines ug nanghinaot siya nga masugdan kini karong Enero 2025.

Ang mga makadawat og maintenance medicines dilli lang kini limitado alang sa mga senior citizen apan lakip na usab sa adunay high blood, diabetes, ug uban pa nga nanginahanglan og maintenance sa ilang mga gipamati sa lawas. BDB BANAT NEWS