Phivolcs nakatala og 288 ka volcano-tectonic earthquakes sa Kanlaon

CEBU, Philippines — Niabot ngadto sa 288 na ka volcano-tectonic earthquakes o pagtay-og ang natala sa Philippine Institute of Volcanology and Seismology (Phivolcs) sa bulkan sa Kanlaon sugod sa alas 8:30 sa gabii niadtong Septiyembre 9 karong tuiga.

Matud sa Phivolcs nga ang kalihokan sa Kanlaon adunay epekto sa pipila ka barangay sa Canlaon City sa Negros Oriental.

Gani adunay mga nagdaguok nga mga tingog nga mabati sa mga residente sa Bago City samtang adunay mga aso sa sulfur sa pipila ka barangay sama sa Bago, La Carlota ug Canlaon.

Ang Phivolcs nipahimangno sa publiko hilabina sa mga residente duol sa bulkan nga padayong giisa ang alert level 2 tungod sa padayon usab nga pagdaghan sa kalihokan sa bulkan.

“The current seismic activity may lead to eruptive unrest and an increase in the alert level”, matud sa Phivolcs nga niabiso usab sa publiko nga kanunay nga mag-andam ug likayan ang pagsulod sa upat ka kilometro nga radius sa Permanent Danger Zone (PDZ) aron mamenosan ang rsigo gikan sa volcanic hazards sama sa pagdahil sa mga dagkong bato, “ballistic projectiles” ug uban pa.

Ang Phivolcs nihatag usab og abiso sa mga angay ug dili angay nga himuon karon nga padayon ang kalihokan sa Kanlaon.

Ang mga hazard nga posibleng mahitabo mao ang kalit lang nga “phreatic eruptions, eruptive unrest”

Gawas nga gidili ang pagsulod sa 4-kilometer PDZ ang mga eroplano gidid-an sa pagpatungod sa summit sa bulkan.

Ang DOST-PHIVOLCS padayon nga nag-monitor sa Kanlaon ug sa mga kalihokan niini. Ang Alert Level 2 sa maong bulkan giisa sukad pa niadtong Hunyo 3, 2024. BDB BANAT NEWS