Marcos: Quiboloy napugos og gawas

CEBU, Philippines — Napugos og gawas ug dili boluntaryong nitahan sa iyang kaugalingon ang doomsday evangelist nga si Apollo Quiboloy sumala pa ni Presidente Ferdinand Marcos Jr., sukwahi kini sa pag-insister sa kampo sa pastor nga boluntaryo kining nitahan ngadto sa Armed Forces of the Philippines.

Si Marcos nagkanayon bisan ang AFP ang unang nakahupot kang Quiboloy, resulta kadto sa presyur nga gipahamtang sa police operations sa PNP ug napugos lang gyud kini sa paggawas sa iyang gitagoan niadtong Domingo sa hapon.

Matud pa sa pangulo, ang nahitabo usa gyud ka “police action” ug ang papel sa AFP didto, backup lang sa PNP nga dugay ng nangita kang Quiboloy sa KOJC compound sa naulahi sukad pa niadtong bulan sa Agosto.

“This is how it should be done, you can do this without hurting anyone, you can do this without shooting anyone. That is what police work is meant to be and this is police work at its best,” matud pang Marcos.

Niadtong Domingo, ang abogado ni Quiboloy nga si Ferdinand Topacio miinsister nga dili mga polis ang nakadakop sa iyang kliyente kondili mitahan kini sa AFP intelligence unit. 

Apan human sa iyang paglugwa gikan sa gitagoan, gikostudiya siya sa PNP  alas 5:30 sa hapon ug gidala dayon sa Manila  sumala pa sa tigpamapa sa PNP nga si Col. Jean Fajardo.

“We now leave Mr. Quiboloy to the judiciary. We will treat him like any other arrested person and we will respect his rights,” matud pa sa pangulo apan miklaro nga walay special treatment nga madawat ang pastor.

Si Quiboloy gipangita na sa mga otoridad sugod pa niadtong bulan sa Abril 2024 tungod sa paggawas sa warrant of arrest sa kasong child and sexual abuse.  Duna sab siyay laing mga kaso sa mga nagkalain-laing korte didto sa Amerika tungod sa human ug sex trafficking ug uban pa. Sumala pa ni Justice Secretary Jesus Crispin Remulla, gipaabot nila nga moduso og extradition request sa Pilipinas ang Amerika aron dad-on didto sa ilang nasud si Quiboloy aron paatubangon sa korte tungod sa iyang mga kaso didto.

Apan iyang giklaro nga una siya i-extradite ngadto, kinahanglan una siyang moatubang sa mga kaso dinhi sa Pilipinas.

Kinahanglan lang  sa US mo-request sa kalihim sa Department of Foreign Affairs nga maoy moduso niini ngadto sa DOJ ug ang Court of Appeals maoy modesisyon.

Kagahapong adlawa, si kanhi presidente Rodrigo Duterte ug mga supporters ni Quiboloy mipasaka og mga kaso batok ni DILG Benhur Abalos Jr. ug opisyales sa PNP tungod sa nahitabo sa suds a KOJC compound atol sa operasyon pagpangita sa maong pastor.

"Binantaan kami…maski magretire daw…katakot-takot na demanda ang ihaharap samin," matud pang Abalos.

Gawas kang Abalos, gikiha sab si PNP chief General Rommel Marbil ug PNP Region XI chief Brigadier General Nicolas Torre III.

Si Quiboloy ang spiritual adviser  ni Duterte kaniadto. Si Duterte sab maoy gitudlo ni Quiboloy nga property administrator sa Kingdom of Jesus Christ (KOJC) sugod niadtong bulan sa Mayo.