Alice Guo subling gi-contempt sa Senado

CEBU, Philippines — Subling gi-cite in contempt sa Senado ang gitaktak nga mayor sa Bamban, Tarlac nga si mayor Alice Guo kagahapon, atol sa unang pagbalik niini sa hearing sud sa tulo ka buwan.

Gi-contempt si Guo tungod sa padayong pagmagahi niini pagtubag ug paghatag og impormasyon bahin sa mga pangutana sa mga senador.

Si Sen. Risa Hontiveros, pangulo sa Committee on Women, Children, Family Relations and Gender Equality unang nangutana kang Guo kun siya ba si Guo Hua Ping.

Pasimple ra sab kining gitubag ni Guo sa Tinagalog nga siya si Alice Guo hinungdan sa kayugot sa mga Senador. 

Ang National Bureau of Investigation mikompirmar na nga ang fingerprint ni Guo nitakdo sa fingerprint sa Chinese national nga si Guo Hua Ping.

Tungod niini, gi-cite in contempt ni Hontiveros si Guo ug gidasonan dayon ni Sen. Joel Villanueva.

"I move to cite Guo Hua Ping, also known as Alice Guo, in contempt of the Senate, for testifying falsely and evasively before this committee," matud pang Hontiveros.

Gawas sa maong pangutana, daghan pang mga pangutana ang mga senador nga wala sab hatagi ni Guo og tubag tungod sa pangangkong para kini sa iyang seguridad.