CNU nitanyag na og masters nursing education

CEBU, Philippines — Opisyal nga gilusad sa Cebu Normal University (CNU) ang labing una nga programa sa Master in Nursing Education (MNE) sa Central Visayas nga magsugod sa unang semester sa S.Y 2024-2025.

Sa usa ka press conference niadtong Sabado, Septiyembre 7, 2024, ang Presidente sa unibersidad nga si Dr. Daniel Ariaso Sr. niingon nga ang CNU nagsugod na sa pagtanyag niining usa ka tuig ug non-thesis master's degree program karong semester ug bukas na sila sa pagdawat og mga estudyante.

Ang MNE nga programa adunay usa ka talagsaon nga bahin nga nagtugot sa mga practicing nurses nga makakuha og credit alang sa ilang may kalabutan nga klinikal ug kasinatian sa pagtudlo subay sa recognition of prior learning (RPL).

Ang kurikulum sa programa naglakip sa 10 ka mga kurso, diin ang mga estudyante gikinahanglan nga makakuha og 30 ka mga yunit sa pagtudlo ug praktikal nga kurso (15 nga mga yunit sa didactics ug 15 nga mga yunit nga Related Learning Experience, nga naglakip sa pagtudlo sa demo ug clinical preceptorship, ug uban pa).

Giablihan sa unibersidad ang maong programa aron madungagan ang gidaghanon sa mga kwalipikadong mga nursing faculty sa rehiyon, pagsulbad sa kakuwang sa hanas nga mga magtutudlo na nurse, ug pagbutang sa CNU sa usa ka global nga arena. Matud ni Dr. Ariaso naghunahuna usab siya nga ipakatap kining programa sa ilang mga partners sa lainlaing State Universities and Colleges ug i-extend ang mga serbisyo ug kontribusyon gawas sa Sugbo o Rehiyon 7.

Sa laing bahin, si Dr. Ariaso niingon nga ang College of Nursing and Allied Health Sciences (CNAHS) ubos sa pagpangulo ni Dr. Laurence Garcia, OIC Dean, "prepared, ready, ug competent" sa pagtanyag sa programa.

Nagkanayon si Dr. Garcia nga gisugdan na sa CNU ang pagdawat og online applications sugod niadtong Miyerkules, Septyembre 4. Samtang sa Setyembre 18, 2024 ang deadline sa pag-aplay.

Dugang niya nga alang sa pilot program karong semester, ang kolehiyo modawat ug 100 ka mga estudyante nga rehistrado nga mga nurse nga adunay labing menos usa ka tuig nga clinical experience ug mahimong mokuha sa bag-ong MNE program pinaagi sa blended learning.

Apan kinahanglan usa nga makapasar ang mga estudyante sa comprehensive examination ug teacher portfolio assessment. Aron usab makapahimulos sa pilot program, ang mga estudyante mogasto lang og P28,180 sa tuition ug miscellaneous fees sa tibuok usa ka tuig o duha ka semestre ug usa ka summer.

Dugang pa, ang mga interesadong estudyante kinahanglang mosumitir og lima ka documentary requirements online, lakip ang updated PRC Card, honorable dismissal gikan sa katapusang eskwelahan nga gitunghaan, Transcripts of Records, Certificate of Employment, ug photocopy sa ilang PSA/NSO birth certificate. Ang mga orihinal nga mga dokumento i-submit lamang atol sa pag-enrol, samtang ang entrance examination ma-iskedyul atol sa aplikasyon. (BANAT NEWS)