Gipaak sa maestro?

CEBU, Philippines — Usa ka magtutudlo sa Don Vicente Rama Memorial National High School sa Barangay Basak sa Cebu City ang gireklamong namaak og duha niini ka mga tinun-an niadtong nakalabay nga adlaw nga Biyernes tungod matud nagdumili pagpakita sa ilang mga abs.

Si Kapitan Dave Tumulak mi-post sa iyang Facebook account og: "Oi Hala ug mang gigil ka sirmam mamaak diay ka, basta dili pakita sa Abs Hagbungon? Aw ako hagbong na daan.”

Ang iyang post miani og 357 ka emoticons, 62comments ug 52 shares hangtud ning pagsuwat sa balita maong nakakawhat kini og atensyon sa mga netizens.

Matud pa ni Tumulak, niadtong adlaw nga Biyernes adunay kalihukan sa maong eskuylahan ug gipatawag sa maong maestro ang duha ka lalaking tinun-an ug giingong gipaisa ang ilang t-shirts kay tan-awon ang ilang abs.

Apan giingong nauwaw ang mga bata ug nagdumili sa pagbuhat sa gisugo sa maestro. Diha na giingong nalagot ng magtutudlo ug gipamaak.

Ang mga estudyante nisumbong kini sa ilang adviser hinungdan nga giingong nagkatinubagay ang duha magtutudlo ug nakuhaan sab og video ang maong gireklamong maestro nga nangasaba sa mga tinun-an.

Ang usa amahan sa maong estudyante nga usa ka polis sumala pa ni Tumulak nakakuha og hulagway sa pinaakan ug nakakuha na sab og medical certificate.

Sumala pa ni Tumulak aduna nay reklamo nga giduso ngadto sa buhatan sa Department of Education ug gipahigayon na usab ang imbestigasyon.

Gipadayag ni Tumulak, dili siya gusto nga tabon-tabonan ang panghitabo ug dili sab siya gusto nga mapagan ang ubang mga nagtinarong nga mga magtutudlo.

Giawhag sab niya ang publiko nga di tamayon ang duha ka tinun-an kay sila maoy nabiktima.

Si Tumulak nagkanayon nga nakaestorya niini ang gireklamong magtutudlo ug kini mipadayag nga atubangon niini ang reklamo apan giklaro niini nga dili tinuod nga namaak siya kondili natuto siya ngadto sa bata kay napandol kini. (BANAT NEWS)