POGO gironda

CEBU, Philippines — “This is a 100-percent illegal POGO.”  Mao kini ang gikompirma ni Winston Romeo Casio, tigpamaba sa Presidential Anti-Organized Crime Commission (PAOCC) human sa ilang malampusong raid nga gihimo diha sa Tourist Garden Hotel nga giingong nag-operate isip Philippine Offshore Gaming Operator (POGO) sa Barangay Agus, Lapu-Lapu City, niadtong Agosto 31, 2024.

Ang raid gipahigayon sa hiniusang pwersa sa National Bureau of Investigation - Region 7 (NBI-7), Presidential Anti-Organized Crime Commission (PAOCC), Inter-Agency Council Against Trafficking (IACAT), Bureau of Immigration (BI), Armed Forces of the Philippines (AFP), ug Lapu-Lapu City Police Office (LLCPO).

Nakiglambigit usab ang Department of Social Welfare and Development (DSWD) sa operasyon aron motabang sa mga potensyal nga biktima sa trafficking.

Kapin sa 100 ka mga langyaw nga naglakip sa mga Intsik, Indonesians, ug mga Burmese gikan sa Myanmar ang na-rescue atol sa raid.  Dugang pa, lima ka mga Filipino nga administrador o manager ang nadakpan usab.

Si Casio miingon nga kadaghanan sa mga langyaw, kauban ang lima ka mga manager, misibat gikan sa Pampanga pagkahuman nga gi-raid ang ilang hub didto.

Ang raid gihimo tungod sa hangyo gikan sa Indonesian Embassy human dunay tulo sa ilang mga kababayan nga nagtrabaho sa maong POGO nagpatabang kanila.

Si Casio miingon rescue operations ra gyud unta ang ilang buhaton, apan sa pag-abot nila sa resort, nakit-an nila ang operasyon sa mga langyaw .

“We were just to rescue the Indonesian nationals kaya lang pagdating namin dito, in flagrante delicto (caught in the act), nakita namin mayroon mga scam farm run by Chinese, Indonesians, and from Myanmar,” ni Casio pa. Nadiskobrehan usab ang gatusan ka mga langyaw nga nagbuhat sa ilegal nga online gaming operations sa mga temporaryo nga workstations sulod sa resort.

Nasuta nga adunay restaurant, grocery store, in-house dormitory, ug bisan usa ka health facility sa sud nga gituohang pinatuyo aron di makagawas ang mga trabahante sa compound.

“This is a 100% illegal POGO…Lahat ng nakita namin dito ay enough evidence to be able to file cybercrime offense for facilitating cybercrime related gambling, child trafficking,” dugang pa ni Casio.

Padayun karon ang imbestigasyon pagila kun kinsa ang tagiya sa maong resort.Matud pa nga usa ka pampublikong resort ang lugar apan giusab ug nahimong semi-private nga establisamento ug ang mga langyaw ra ang gitugotan nga makasulod.

Sa press release nga giluwatan  sa Bureau of Immigration, si Commissioner Norman Tansingco miingon nga kinahanglang pasakaan og kaso ang tagiya sa resort tungod sa pagtago sa mga illegal aliens sa ilang lugar.

 “We will suggest to the authorities to file cases against resort owners to allow their properties to be used by illegal aliens in their covert operations,” matud pang Tansingco.

Ang mga langyaw mag atubang og inquest proceedings ug temporaryo nga idetener sa dili pa ma-deport.

Si NBI-7 Director Atty. Rennan Augustus Oliva miingon nga ang ilang inisyal nga aksyon mao ang paghimo og imbentaryo sa mga na-rescue nga langyaw ug pagsugod sa pag-file sa mga kaso. “As we gather more evidence, of testimonies from the rescued victims we can make follow-up investigations and operations,” puno pang Oliva.

Sa usa ka eksklusibong interbyu sa The Freeman/Banat News, si Police Lt. Col. Christian Torres, tigpamaba sa LLCPO miingon nga adunay report ang intelligence operatives nga dunay mga gidudahan nilang POGO hub sa maong lugar. Kahinumdoman nga niadtong Hulyo, si Mayor Junard “Ahong” Chan miingon nga walay aktibong POGO hubs sa ilang siyudad.

Si Torres usab miingon nga komplikado ang operasyon tungod kay cybercrime kini ug ang NBI IACAT lang ang adunay kapabilidad pag-detect ug pagsubay sa ingon nga mga operasyon.

Mao pa kini ang labing unang raid batok sa POGO sa tibuok Sugbu ug gituohang aduna pay daghang susama niini dinhi nga gipangita sa mga otoridad.—Jonnavie Villa ug Romeo Marantal/IBM BANAT NEWS