TEAM nakasakmit og mga pekeng lisensiya gikan sa mga motorista

CEBU, Philippines — Mga drayber nga naghupot og peke nga lisensiya sa pagmaneho og sakyanan  ang nasakmit sa mga personnel sa Traffic Enforcement Agency  of Mandaue (TEAM) ug  ang tag-iya makabayad niini og P5,000 nga multa.

Si Hylle Retuya, assistant department head  sa TEAM nagkanayon nga nakapahingangha niya ang iyang namtikdan nga nagkadaghan na karon sa mga drayber ang naghupot og peke nga lisensiya.

Matud ni Retuya nga sa nilabay nga mga semana niining bulan sa Agosto karong tuiga dili moubos sa 20 ka fake driver’s license ang ilang nasakmit.

Ang nahisgutang mga drayber nakalapas kini sa lagda sa trapiko ug dihang gisikop kini sa traffic enforcer gipangayoan og lisensiya ug nasuta nga peke ang driver’s license niini.

Apan giingong ang drayber nga naghupot og pekeng lisensiya wala masayod nga peke ang driver’s license nga iyang gihuptan.

Giingong ang nadakpan nga motorista dihang nakamatikod nga peke ang iyang lisensiya human gisusi sa enforcer ang daling nipabulhot sa iyang motorsiklo.

Matud usab ni Retuya nga base sa gipatuman nga lokal nga ordinansa nikabat ngadto sa P5,000 ang multa sa paghupot og peke nga lisensiya. — BDB BANAT NEWS