EMB giawhag nga mohimo OG inspection sa polog landfill

CEBU, Philippines — Nanawagan si Kagawad Lurimarc Alin sa Barangay Polog, Consolacion ngadto sa Environmental Management Bureau- 7 (EMB-7) nga maghimo og usa ka “surprise inspection” sa Polog landfill tungod sa nangalisbong baho ug polusyon gikan sa maong pasilidad.

Ang mga lumulupyo sa barangay Polog, Consolacion padayong nireklamo sa baho ug polusyon tungod sa landfill nga gidumala sa Asian Energy Systems Corp. (AEC), busa si Alin nanawagan nga i-surprise site visit inspection kini aron masusi kun nisunod ba kini sa mga regulasyon.

“Ang panawagan ko lang sa EMB na talagang kapag ganyan ang transaksyon mahigpit nilang tsine-check. Ang gusto ko lang mangyari, magkaroon ng ano, magkaroon ng inspeksyon, kung saan pa eh surprise. Surprise site visit inspection, ‘yung talagang lahat ng mga requirements ng EMB," matud sa kagawad.

"Maganda talaga na magkaroon sila ng surprise inspection. Hindi nila ipaalam… na may nag-inspeksyon para alam natin kung gumawa ba sila ng tama or nasusunod pa rin ba ‘yung batas,” dugang niya.

Sa usa ka radio interview, matud ni Alin nga wala pa gihapon makumpirma sa barangay officials kon naghimo na ba og inspeksyon ang EMB sa landfill bisan sa kadaghang reklamo nga napatik online. Samtang nagpaabot sila sa aksyon sa EMB, padayon silang magmonitor ug maghimo og mga lakang aron maminusan ang epekto sa landfill sa ilang barangay.

Kahinumdoman nga sa pagsugod sa tuig 2024, nanawagan ang mga lumulupyo nga sirad-an ang landfill tungod sa ilang giingong nangalisbong baho, polusyon, kontaminasyon sa tubig ug delikado sa panglawas sa ilang komunidad.

Dugang pa, naglisud usab ang mga driver sa trak sa basura sa pag-access sa landfill tungod sa dili maayo nga kondisyon sa kalsada.

Gibulgar usab sa usa ka whistleblower kaniadto nga dili maayo ang sistema sa pagdumala sa basura sa landfill ug gipasabot ang mga peligro nga giatubang sa mga trabahador ug sa mga lumulupyo nga duol sa landfill. Niadtong May 7, 2019 ang maong landfill gipahunong og operate subay sa Cease and Desist Order (CDO) nga giluwatan sa EMB-7 human nahibaw-an nga napakyas ang management niini sa pagpatuman og Environmental Management Plan (EMP) nga miresulta sa landslide niadtong May 4, 2019. Apan niadtong Agosto 9 sa samang tuig gilibkas ang CDO human nakompleto sa AEC ang rehabilitasyon sa pasilidad. — MEL BANAT NEWS