Circumferential Road sa Santa Fe magamit na sa publiko

CEBU, Philippines — Hingpit na nga giablihan ngadto sa publiko ang 4.32 kilometro nga Hilantagaan Circumferential Road sa isla sa Hilantagaan Island nga kabahin sa lungsod sa Santa Fe. Isla sa Bantayan.

Ang pag-abli sa maong dalan nga lima ka metros ang gilapdon ug unom (6) ka pulgada ang gibag-on nahitabo niadtong Agosto 27.

Ang Kapitolyo migasto og P45.9 milyones alang sa maong dalan nga tuyok sa tibook isla.

Ang maong island-barangay sa Hilantagaan mabyahe 10 minutos pinaagi sa bangka gikan sa Bantayan island.

Samtang, gi-inagurahan usab sa mga opisyal sa Sugbo ang tulo ka andana nga bag-ong edipisyo sa Bantayan District Hospital nga nahimutang sa Brgy. Ticad sa lungsod sa Bantayan.

Moabot sa P54.5 million ang gigasto sa Kapitolyo alang sa maong pasilidad nga adunay Out-Patient Department, Animal Bite Treatment Center, ug Laboratory Complex.

Ang maong tambalanan bag-o pa lang giaprobahan sa Department of Health ug gisaka ang status gikan sa usa ka infirmary ngadto sa usa ka Level 1 Hospital diin mamahimo na mapahigayon sa maong tambalanan ang pag-opera sama sa caesarian section ug uban pa.

Niadtong bulan sa Marso, ang Kapitolyo uban sa pribadong kompaniya miinstalar og 10-unit hemodialysis center aron matubag ang problema ug panginahanglan sa mga pasyente nga adunay sakit sa bato o kidney. — MEL BANAT NEWS