“Basura in a Bottle” mikolekta og 5mil ka tonelada nga plastic

CEBU, Philippines — “Basura in a Bottle” program sa Barangay Basak San Nicolas gimugna ni Barangay Kapitan Norman Navarro aron maagni ang mga lumulupyo niini nga makamao mo-segregate sa ilang mga basura.

Pinaagi sa programa nga “Basura in a Bottle”, ang barangay mohatag og ganti nga mga school supplies ug delata ngadto sa katawhan bugti sa plastic nga basura nga ilang mapundo ug mahatag.

Matud pa ni Konsehal Giovanni Tabada sa Barangay Basak San Nicolas nga nakakolekta na ang barangay og 5,000 ka toneladang plastic nga basura human gisugdan ang programa niadtong Pebrero ning tuiga.

Si Tabada kinsa chairman sa environment committee sa barangay miingon nga ang maong programa inisyatiba kini ni Barangay Captain Norman Navarro.

“Pirmero namo pag-implement, ilisan namo og lapis ug ballpen ang ilang makolekta nga basura. Every one kilo among ilisan og tulo ka lapis ug tulo ka ballpen,” suma pa ni Tabada atol sa Coastline Management Board teleradyo program pinaagi sa Sugboanon Channel.

Aron mas ma-engganyo pa ang mga lumulupyo sa barangay lakip na ang mga inahan, ang matag duha ka kilo sa plastic, bayluan kini og delata ug usa ka notebook.

Dugang pa ni Tabada nga ang konseho sa barangay ug ang Sangguniang Kabataan migahin og dili momenos P100,000 aron nga mapatuman ang maong programa karong tuiga.

Gani, kumbinsihon sab niya ang iyang mga kauban nga patas-an pa ang budget alang sa sunod tuig, mamahimo na nga makapalit og sinakong bugas isip dugang sa madawat nga insentibo sa mga magpabaylo sa ilang mga basura.

Tumong sa programa aron maminusan ang mga plastic nga basura nga makatampo sa masinate nga pagbaha panahon sa ting uwan.

Napatuman na kini nga programa sa 42 ka sityo sa barangay ug sa samang higayon adunay 20 ka Barangay Environmental Officers (BEO) nga motabang aron pabilin nga mapatuman ang programa. — MEL BANAT NEWS