Cortes masaligon nga hapsay ra ang pagduma ni Bercede sa Mandaue

CEBU, Philippines — Padayon gihapon nga moserbisyo sa mga Mandauehanon si suspended mayor Jonas bisan ug usa na siya ka civilian, human gipatuman sa Department of Interior and Local Government kon DILG ang iyang suspension order.

Suma pa sa mayor nga bisan ang pribado karon niyang kahimtang dili kini babag sa iyang pagserbisyo sa katawhan sa kabarangayan.

Ang transition team ni Mayor Jonas Cortes nakig-alayon sa kampo ni Bise-Mayor Glenn Bercede aron hapsay ug dili maapektohan ang serbisyo sa mga Mandauehanon.

Matud pa ni Cortes, giabagan niya si Acting Mayor Glenn Bercede aron hapsay ang paghulip sa pagpadagan niini sa City Hall sugod niadtong adlaw nga Martes.

Dako ang pagsalig ni Cortes nga han-ay ra ang pagdumala ni Bercede sa kagamhanan sa Mandaue ilabi na kay taas nausab ang serbisyo nga nahimo niini kaniadto nga kapitan hangtud na sa taas nga posisyon.

Gitug-an ni Cortes nga tanang mga kaalyado nila ang nisaad nga motunol sa ilang dakong suporta ngadto kang Bercede.

Si Cortes nituman sa suspension order nga gipahamtang kaniya apan padayon ang ilang gihimo nga mga legal nga lakang batok sa desisyon nga gipahamtang kaniya.

Sa nasayran si Mayor Cortes gihukman sa Ombudsman nga masuspenso og usa ka tuig nga walay sweldo gumikan sa iyang pag-appoint ni Camelo Basaca nga officer-In-Charge sa buhatan sa City Social Welfare and Services Office nga giingong dili kalipikado sa posisyon. —Romeo T. Limpangog/MEL  BANAT NEWS