Solo parents sa mandaue makadawat og ayuda
CEBU, Philippines — Hingpit na nga giaprobahan sa regular session sa konseho sa Siyudad sa Mandaue kagahapon ang ordinansahon nga paghatag og tinuig nga cash assistance sa mga solo parents.
Si Konsehal Jimmy Lumapas, chairman sa Committee on Social Services ang nangamahan sa ordinansahon ug giaprobahan usab sa kinatibuk-ang sakop sa konseho.
Matud pa ni Lumapas nga kapin sa 700 ka mga solo parents maoy nakakompleto sa mga rekisito hinungdan nga sila ang makadawat sa unang pagpanghatag niini karong Nobiyembre ug itingub kini karong tuiga.
Dugang ni Lumapas nga sugod sa tuig 2025 ang mga solo parents modawat sa duha na ka hugna nga pagpanghatag.
Sa unang unom ka bulan nga magsugod sa Enero ilang madawat ang P6,000 ug sa laing unom pa ka bulan hangtud sa Disyembre madawat na usab nila ang laing P6,000 sa pagkumpleto sa P12,000 nga tinuig nilang pinansiyal nga ayuda.
Si Marites Servano nga maoy federation president sa mga solo parents miingon nga ang siyudad sa Mandaue adunay kinatibuk-ang 2,000 kapin ka mga solo parents apan ang kapin sa 700 lamang ang makadawat tungod kay sila man ang unang nakakompleto sa mga gikinahanglan nga mga rekisito. Sa nalambigit nga balita si Department of Social Welfare and Development (DSWD) Secretary Rex Gatchalian misaad nga padayon silang makig-alayon sa mga inter-agency committee aron mapadali ang paghatag og mga benepisyo sa mga solo parents.
Matud niya nga samtang ang DSWD nagpatik na sa mga benepisyo sa pakigtambayayong sa ubang mga departamento, padayon silang maningkamot nga makuha ang ubang kinahanglang impormasyon gikan sa lainlaing ahensya nga responsable sa paghatag og mga benepisyo.
Ang Department of Labor and Employment (DOLE) ug Technical Education and Skills Development Authority (TESDA) mao pa ang nakasumite sa ilang tagsatagsa ka listahan sa mga benepisyo alang sa mga solo parents. (BANAT NEWS)
- Latest
