Gitagod og tigbas sa karibal

CEBU, Philippines — Gumikan sa pangabubho ug kasuko gitigbas patay sa usa ka 30 anyos nga construction worker ang kaipon sa iyang kanhi live-in partner nga usa ka konduktor sa jeep ug ex-convict kansang lawas napalgan sa kalibunan sa Sitio Upper Puti, Barangay Buhisan, Siyudad sa Sugbo.

Pasado alas 7 sa buntag kagahapon nakit-an ang patay'ng lawas sa biktima nga si Rico Engracial Oquiño, 25. Matud pa napriso kini kaniadto tungod sa kaso sa ilegal nga drugas ug nagpuyo sa Barangay Matab-ang, Toledo City.

Samtang ang suspek mao si Jephosin Zusubrado Cantunao, 30, construction worker nga kabarangay ra sab sa biktima sa Matab-ang, Toledo City.

Sa imbestigasyon sa Labangon Police Station 10 sa Cebu City Police Office nga giingong ang suspetsado dunay kasuko sa biktima gumikan sa selos ug giingong mibahad pa kini nga patyon niya ang biktima.

Nagkanayon si Police Major Eraño Regidor, hepe sa Labangon Police Station 10 nga Lunes sa gabii gibisita sa suspetsado ang iyang kanhi kaipon nga si Jarisa Basilote Biasong,23,  kay nagtunol og kwarta pangsustento sa ilang 3-anyos nga anak.

Paglabay sa pila ka minuto giingong nagkalalis ang duha tungod sa pangabubho kay nag-ipon na ang babaye ug ang biktima hinungdan sa kasuko niini ug dalidali nga nilakaw.

Nasayod matud pa ang suspek kun unsang orasa mouli ang biktima maong giatangan niya kini sa agianan.

Pagkataud-taod nakadungog nalang ang mga tawo nga dunay nipaka nga daw natumba nga motor. 

Nibalik ang suspek sa gipuy-an ni Biasong ug gisultihan kini og: 'wala sila'y nadungog' ug pagkahuman dalidali kining misibat.

Gumikan sa ilang kahadlok wala naningog ang mga nagpuyo sa dapit hangtod nga kagahapon sa buntag nakit-an ang patay'ng lawas sa biktima nga puno sa tinigbasan.

"Klaro kaayo sa plastada nga gabii pa gyud nahitabo, naa tay witness na magpamatuod nga mao gyuy nagtira. So ang cause of death niya initially hacking wounds in fact naigo pa iyahang helmet nabuak pa gani. So karon mahibaw-an nato naa man guy nadunggan nga naay buto atong mahibaw-an sa autopsy but initially paghiling nila puro hacking wounds," sigon ni Regidor

Wala makit-i sa kapulisan ang hinagiban nga gigamit sa suspetsado sa paghimo sa krimen ug sa ilang tan-aw gidala kini sa suspetsado.

Dihang giproseso sa SOCO ang crime scene nakarekober ang kapulisan pito ka putos nga gituohang shabu , kwarta nga P650 gikan sa bulsa sa biktima ug usa ang motorsiklo nga Suzuki Smash.

Tungod niini, wala gisalikway sa kapulisan nga posibleng nagmaligya og illegal nga drugas ang biktima. Padayon ang hot pursuit operation sa kapulisan sa suspetsado apan nakadawat sila og impormasyon gusto kining motahan. (BANAT NEWS)