Polis nga namukbok og contingent hayan kasohan
CEBU, Philippines — Gipaabot nga pasakaan og kasong physical injury ug kalapasan sa Republic Act 7610 kun Child Abuse ang polis nga gidakop human matud pa nanagmal og walo ka mga batan-on nga sakop contingent sa Lungsod sa Compostela nga apil sa Pasigarbo sa Sugbo 2024 niadtong Sabado sa hapon diha sa gym sa Guadalupe Elementary School nga maoy ilang billeting area.
Ang maong polis nga nagranggo og Police Corporal ug nadestino sa Compostela Police Station nabilanggo karon sa Guadalupe Police Station 9 sa Cebu City Police Office.
Una nang nabalita nga ang choreographers nangayo og tabang sa maong polis aron matapok ang tanang miyembro sa Compostela contingent kay hisgutan ang mga instructions ug uban pa.
Giingong bag-ohay pang nahuman og practice ang grupo ug wala pay pahuway ug wala pa nakaligo ug nakakaon ang uban mao nga gipangkapoy ug dugay nakasanong sa pagpatawag kanila.
Sa pag-abot matud pa sa mga dancers ug propsmen giingong gibunalan sila largo og kahoy ug wala paminawa ang ilang habig sa maong polis, agi og “disiplina.”
Na-trauma matud pa ang mga bata ug dunay nanghilak nga nakasaksi sa hitabo.
"Supposedly hindi naman talaga trabaho ng pulis ‘yun dahil sa security lang sila pero dahil assigned din sila sa Compostela kaya pinagbigyan na lang na tumulong tawagin yung mga contingents. Duon na napalo at nasaktan ng pulis yung mga ibang contingents. Accordingly, sabi ng suspect mahirap daw talaga sila pasunurin kaya niya nagawa yun," sigon ni Police Major Miles Damoslog, hepe sa Guadalupe Police Station.
Si Police Lieutenant Colonel Janette Rafter, Deputy City Director for Administration sa Cebu City Police Office miingon nga gipaabot nalang nila ang mga reklamante kun mopasaka og kaso batok sa maong polis.
Samtang si Police Lieutenant Colonel Gerard Ace Pelare tigpamaba ni Police Regional Office-7 Director Brigadier General Anthony Aberin miingon hatagan og higayon ang maong polis nga makasulti sa iyang habig apan ilang gipasalig nga dili nila kini duphan kun sayop iyang gibuhat. (BANAT NEWS)
- Latest
