Mga residente duol sa Binaliw landfill padayong nagreklamo sa baho

CEBU, Philippines — Bisan pa sa mga reklamo sa baho gikan sa Material Recovery Facility (MRF) ug sanitary landfill sa Barangay Binaliw si Cebu City Mayor Michael Rama kinsa ubos pa sa preventive suspension naglaom gihapon sa expertise sa operator sa pasilidad niini.

Nasayran nga ang Prime Integrated Waste Solutions Inc. (PIWS) maoy operator sa nahisgutang MRF ug landfill.

Nunot sa kahasol ug epekto nga nadala sa baho sa Binaliw landfill ngadto sa silingang mga molupyo niini, sila si Rama ug Acting Cebu City Vice Mayor Donaldo Hontiveros nihatag sa ilang pamahayag kabahin niini.

Ang nahisgutang MRF naestablisar kini niadtong buwan sa Enero niining tuiga.

Matud ni Rama nga atol sa paglusad sa MRF gitambongan kini ni Secretary Maria Antonio Yulo- Loyzaga sa Department of Environment and Natural Resources (DENR) nga nagpakita sa suporta sa teknolohiya nga gibutang diha sulod sa pasilidad.

Si Rama nagkanayon nga dihang nakuha na sa PIWS ang 10.4 ka ektarya nga landfill gikan sa ARN Central Waste Management Inc. ilang ipadayon ang gitugot ug gitinguha nga mahimong waste to energy (WTE) kini.

Matud usab ni Rama nga adunay lain-laing intervention nga mahimong buhaton ug ang PIWS dili na kinahanglang tudloan niini.

Samtang padayon nga malaumon si Rama sa aksyon sa PIWS nangayo siya og pasaylo sa kahasol nga nasinati sa mga residente.

Sa iyang bahin, si Hontiveros nibutyag nga nasinati niya ang maong baho nga gikan sa landfill sa Binaliw niadtong Nobiyembre 25, 2021.

Tulo ka tuig ang nilabay, si Hontiveros niduso og resolusyon alang sa direksiyon sa landfill nga niresulta sa desisyon sa pgabutang og MRF.

Gikataho nga ang mga residente sa Sitio Kainsikan sa Barangay Binaliw nagreklamo sa baho sa MRF ug sanitary landfill.

Base sa Facebook post ni kanhi Apas barangay captain Ramil Ayuman nipadayag kini nga ang mga residente nakasinati na sa baho sukad pa kaniadto.

Laing post sa FB nga ang baho sa landfill niabot na sa Sitio Mansawa sa maong barangay.

Sa samang post, si Randy Maglasang, security guard sa usa ka subdivision sa maong barangay nagkanayon nga ang baho sukad pa niadtong tuig 2018 nasinati sa mga residente ug usahay molungtad pa og 24 oras. (BANAT NEWS)