OSCA nangayo og dugang P200M nga budget

CEBU, Philippines — Ang Office for Senior Citizens Affairs (OSCA) sa Dakbayan sa Sugbo mangayo og dugang P200 milyones nga budget appropriation alang sa tuig 2025 diin tumong niini ang pag-cover sa 5,000 ka senior citizens nga anaa pa sa waiting list.

Kagahapon, si Atty. Homer Cabaral, pangulo sa OSCA nagkanayon nga ang maong budget proposal dugang lang sa P1.80 bilyones nga budget allocation nga giaprobahan alang sa annual budget karong tuiga.

Sa pagkakaron, ang Dakbayan sa Sugbo adunay kinatibuk-ang 91,000 ka rehistrado nga senior citizens ug nagkadawat og P12,000 nga financial assistance matag tuig.  Ang maong cash assistance gibahin kini matag quarter sa tuig o tag P3,000 matag tulo ka buwan.

Matud ni Cabaral nga aduna pa sila’y waiting list sa senior citizens nga 5,000 ang gidaghanon ang wala maapil sa annual budget karong tuiga.

Ang OSCA ni-revalidate kini sa ilang listahan sa beneficiaries aron masiguro nga ang mga malakip mga miyembro nga anaa sa Dakbayan sa Sugbo.

Gitang-tang usab ang mga pangalan sa nangamatay na ug sa mga ni-migrate diin ilisan kini sa mga anaa sa waiting list.

Sa laing bahin, si Cabaral nagkanayon nga nunot sa fake news nga nikatap sa mga rehistradong senior citizens nahapysay na nila kini.

Nasayran nga ang financial assistance alang sa 3rd quarter iduso karong Septiyembre 7, 2024.

Ang pag-apod-apod sa ayuda ipaagi sa matag barangay ug molungtad sa tulo ka adlaw.  Alang sa mga dili makakuha sa ilang mga cash aides kinahanglan nga i-claim kini diha sa Cebu City Hall. Giklaro ni Cabaral nga gikinahanglan lang nga ilisan ang mga ID nga guba ug dili na mabasa. (BANAT NEWS)