Bercede molingkod na isip acting mayor sa Mandaue
CEBU, Philippines — Moasumer na si Mandaue City Vice Myor Glenn Bercede isip acting mayor sa siyudad kini human si Mayor Jonas Cortes gipahamtangan sa Ombudsman og silot nga usa ka tuig nga pagkasuspenso sa katungdan.
Gikompirma ni Bercede nga nadawat na niya ang kamandoan gikan sa Department of Interior and Local Government (DILG)-7.
Ubos sa memorandum nga giluwatan sa DILG-7 pinaagi kang Director Leocadio Trovela niadtong Agosto 24, 2024 nga gipadangat kang Bercede gipadayag nga ang naulahi moasumer na isip acting mayor subay sa lagda sa automatic succession.
Ubos sa Section 46 (a) sa Local Government Code, si Bercede ang moasumer dayon sa gahom ug mga kaakohan isip mayor apan ubos sa acting capacity.
Niadtong Agosto 21, ang Office of the Ombudsman nipahamtang og usa ka tuig nga suspension kang Cortes tungod sa grave misconduct human sa pagtudlo niini og officer-in-charge sa City Social Welfare Services Office (CSWSO) niadtong tuig 2022 nga giingong supak sa gilatid nga lagda.
Sayo pa, Si Cortes nagkanayon nga expected na niya ang maong kamandoan apan ang iyang gikatingad-an nga taas kaayo ang iyang suspension ug gitinguha niya nga mo apelar niini. (BANAT NEWS)
- Latest
