Garcia: Mga bayani lantawon isip tinubdan sa inspirasyon
CEBU, Philippines — Sa pag-obserba sa Dakbayan sa Sugbo sa National Heroes Day gihisgotan ni Acting Cebu City Mayor Raymond Alvin Garcia ang importansiya sa kabatan-onan ug gihinumdoman ang kabayanihan sa medical frontliners atol sa pagkuyanap sa COVID-19 pandemic.
Gidasig ni Garcia ang mga kabatan-onan nga alang kaniya mao ang paglaum sa nasud sa pagtan-aw sa mga bayani isip tinubdan og inspirasyon.
“In our numerous heroes, you will find on display wonderful qualities such as bravery, selflessness, patriotism, nationalism and deep love for country. Truly, they are role models worth imitating, and their examples followed”, matud ni Garcia.
Gipahinumdoman ni Garcia nga wala magkinahanglan ang mga batan-on sa akto nga pagbukas sa mga libro sa kasaysayan aron makit-an ang mga bayani diin makita kini ngadto ni bisan kinsa.
Sa samang mensahe, gihinumdoman ni Garcia ang medical frontliners dihang ang tibuok nasud nakigbatok sa pandemiya nga COVID-19.
Gihangop usab ni Garcia ang mga magtutudlo diin matud niya nagsakripisyo sa daghang oras ug paningkamot sa pag-umol sa kabatan-onan sa nasud.
Nunot niini, si Acting Vice Mayor Donaldo Hontiveros ang nangulo kagahapon sa seremoniyas sa National Heroes Day nga gipahigayon diha sa Plaza Sugbo. Gitambongan usab kini sa mga sakop kapolisan, Philippine Navy, Knights of Rizal, Knights of Colombus, ug Department of Education sa siyudad.
Nitambong usab ang pipila sa mga empleyado ug ang mga pangulo sa departamento sa siyudad lakip sila si Konsehal Francis Esparis ug Joel Garganera.
Atol sa iyang mensahe, si Hontiveros nagkanayon nga ang kontribusyon sa matag empleyado pinaagi sa paghatag og dekalidad nga serbisyo ngadto sa publiko ang timailhan sa ilang kaugalingong kahulogan sa kabayanihan.
"Let us honor our heroes by becoming everyday heroes ourselves…. Together we can build a brighter future inspired by the valor of the past. And may we all continue to serve with a heart of a true hero, ni Hontiveros pa. (BANAT NEWS)
- Latest
