Nangulata’g senior citizen gipadakop

CEBU, Philippines — Napriso ang usa ka 50-anyos nga lalake human kini gireklamong mikulata sa senior citizen nga biyuda pasado alas-6 sa gabii sa adlaw'ng Domingo, Agosto 25, 2024 sa Sitio Villa Buena, Barangay Kinasang-an, dakbayan sa Sugbo.

Ang nadakpan mao si Clarito Cagang, 50 anyos, minyo, building maintenance ug nagpuyo sa Sitio Exoville l, Barangay Kinasang-an ning siyudad.

Samtang ang nireklamo mao si Virginia Gingoyon, 62, molupyo sa maong lugar ug nakaangkon og bun-og sa nagkadaiyang bahin sa lawas ilabi na sa nawong.

Nagpakitabang ang biktima sa kapulisan  human matud kalit lang siya gikulata sa suspek dihang mosulod na unta siya sa ilang panimalay.

Giingong nagtagay ang suspek uban ang mga higala niini ug sa iyang pag-agi giingong giduol ug gikomprontasi siya.

Gisumbag matod pa siya sa nagkadaiyang bahin sa kalawasan.  Ang suspek sa iyang bahin hugtanong mihimakak sa pasangil ug miingon nga dunay kasuko ang biktima niya kay giingong naa siya'y nabungat nga pulong nga wala mauyoni sa biktima. (BANAT NEWS)