11 ka tawo sikop sa gipahigayong SACLEO sa kapolisan sa Liloan

CEBU, Philippines — Niabot ngadto sa 11 ka tawo nga nakahimo og laing-laing kalapasan ang nasikop atol sa gipahigayong tulo ka adlaw nga Simultaneous Anti-Criminality Law Enforcement Operation (SACLEO) sa Liloan Police Station sugod niadtong Agosto 19 handtud sa 21, 2024.

Lima sa maong mga nasikop ang nalambigit sa ilegal nga drugas laing lima ang nalambigit sa ilegal nga sugal ug usa ang giingong nalambigit sa kasong robbery.                  

Matud ni Police Major Charlie Santiago, hepe sa Liloan Police Staion nga sa lima ka pusher nga nadakpan nasakmitan kini og 16.1gramo nga shabu nga nikantidad tanan ngadto sa P109, 480.

Samtang sa kampaniya sa ilegal nga sugal nga nalakip sa ilegal nga swertres ilang nasakmit ang mga gambling paraphernalia.

Ang mga suspetsado kasamtamgan karong nabalhog sa detention cell sa Liloan Police Station ug gikatakdang pasakaan og tukmang kaso sa ilang nahimong kalapasan.

Sa laing bahin, dul-an sa P13 mil ang balor sa ginadili nga drugas ang nasakmit sa kapolisan sa Central Visayas sa ilang usa ka adlaw nga operasyon.

Usa ang nadakpan diin niabot ngadto sa 1.8 gramo nga shabu ang nasakmit nga nibalor ngadto sa P12,240.

Usa ka wanted person ang nadakpan ug duha ka operasyon ang gihimo kalabot sa loose firearms diin duha ang nasakmit ug gitahan ug usa ang nadakpan ug napasakaan og kaso.

Kabahin sa ilegal nga sugal, sa pito ka operasyon kinse ka tawo ang nadakpan ug pito napasakaan og kaso ug nasakmit sa kapolisan ang P1,000 nga pusta.

Ug mokabat ngadto sa P500 mil ang multa nga nakolekta gilan sa 900 ka mga malapason sa nagkadaiyang lokal nga ordinansa. (BANAT NEWS)