Mga tindahan sa kadiwa ng pangulo padaghanon
CEBU, Philippines — Ang Department of Agriculture (DA) nagtinguha nga palapdan ang Kadiwa ng Pangulo nga mga tindahan sa Visayas ug Mindanao isip kabahin sa plano nga mag-abli ug 60 ka tindahan niini sa tibuok nasud karong Septiyembre.
Suma ni DA Secretary Francisco Tiu Laurel Jr. nga gilauman nila nga makaabli og labing menos 60 ka Kadiwa ng Pangulo nga tindahan sa tibuok nasod sunod buwan, aron mas daghang mga Pilipino ang mahatagan og access sa barato nga produkto sa agrikultura, lakip na ang P29 kada kilo nga bugas.
Gawas sa access sa mas barato nga agricultural commodities, si Laurel niingon nga nakig-alayon usab sila sa pipila ka mga food manufacturers sa pag-supply sa ubang mga produkto sama sa cooking oil, presko nga isda, poultry products, ug uban pa.
Matud usab niya nga nakig-istorya sila sa mga manufacturer sa ubang basic goods sama sa mga pampalasa, asukal, ug mga delata aron matabangan ang mga Pilipino sa ilang mga pinansyal nga hagit ug matakdo ang panan-aw ni Presidente Ferdinand Marcos Jr. nga mahatagan ang matag pamilya og barato nga presyo sa pagkaon.
Dugang niana, gitinguha nilang i-standardize ang mga operasyon sa 1,500 nga gipunting nga mga tindahan sa Kadiwa sa matag lungsod sa tibuok nasud, uban ang plano nga makig-partner sa mga kooperatiba ug asosasyon sa mga mag-uuma sa nasud.
Sa pagkakaron, adunay 230 ka mga site sa Kadiwa nga nahimutang tibuok nasud diin 17 niini regular nga nag-operate.
Kaniadto si Laurel nagkanayon nga kun ma-establisar na nila ang hapsay nga logistics flow sa mga butang ug dagan sa transaksiyon, palapdan nila ang programa sa sunod nga upat ka tuig diin target nila ang 800 ngadto sa 1,000 ka tindahan. (BANAT NEWS)
- Latest
