SIMEX gihimo sa BPPO aron mapakgang ang pagpanulis
CEBU, Philippines — Nagpahigayon og Simulation Exercise(SIMEX) ang Bohol Police Provincial Office(BPPO) sa miaging adlaw aron mapakgang ang pagsaka sa insidente sa pagpangawat ug pagpanulis.
Ang maong programa subay na sa anti-criminality campaign sa Provincial Director sa BPPO Colonel Lorenzo Batuan.
May kalabutan sa robbery ug hold-up ang simulation exercise sa kapolisan aron masuta kun unsaon pagtubag sa mga pulis sa maong krimen.
Usa ka scenario ang gihimo sa kapolisan sama sa tulis sa usa ka jewelry shop ug ilang gigukod ang suspek aron makita ang proseso sa pagsikop sa suspek.
Human sa gihimong simulation gipatawag ang tanang nalambigit sa maong SIMEX ug naghimo og debriefing aron matala ang tanang butang nga naobserbahan sa kalihukan.
Base sa record sa kapolisan gikan sa Enero hangtud sa Agosto ning tuiga, ang Bohol Police Provincial Office nakatala og kapin sa 38 ka mga insidente sa pagpanulis o pagpangawat.
Gipaneguro ni BPPO Provincial Director Colonel Lorenzo Batuan nga aktibo ang kapolisan sa Probinsya sa pagbantay sa seguridad ilabi na sa mga dapit nga tapukan og daghang tawo. Giawhag ang mga tag-iya sa establisamento sa pagpatuman sa maximum installation sa CCTV cameras sa ilang lugar. (BANAT NEWS)
- Latest
