Sugboanong Coach, Aldrin Castañeda gihatagan og Hero`s Welcome

CEBU, Philippines — Gihatagan og Hero's Welcome ang Cebuano Coach ni Paris Olympics 2024 Double Gold Medalist Carlos Yulo nga si Allen Aldrin Castañeda sa pag-uli niini sa iyang barangay sa Hipodromo ning Dakbayan sa Sugbo kagahapon, Lunes.

Emosyonal si Castañeda sa dihang niabot sa iyang barangay nga gidak-an nga mao ang Hipodromo sa Cebu City nga naatol pa gayud sa adlaw sa mga bayani.

Gihatagan siya og Hero's Welcome sa iyang mga kabarangay nga gipangulohan ni Kapitan Ruperto Bacolod ug tibuok miyembro sa Barangay Council.

Dako kaayo ug dungog sa ilang mga kasilinganan nga gikan sa ilang barangay ang dakong nadala ni Castañeda human nakadaug si Carlos Yulo.

Matud pa ni Kapitan Bacolod, usa ka dakong dungog nila nga gikan gayud sa ilang gamay nga barangay ang nag-ugmad sa usa ka olympian nga dili lang usa ka gold ang nasakmit kun dili duha gayud.

Gitunol ni Bacolod ang ilang plaque ngadto kang Castañeda sa nadala niini nga dungog dili lang sa Pilipinas apan lakip sa mga Sugbuanon.

Dako ang pasalamat ni Coach Aldrin nga nahimo siyang kabahin sa kalampusan ug kadaugan ni Carlos Yulo, kinsa gihulagway niya nga buotan ug mangihatagon sa isigkatawo.

Human sa Paris Olympics nangandam na usab sila ni Caloy alang sa 2028 Los Angeles Olympics.

Karong adlawa August 27, 2024 hatagan ug Hero's Welcome sa Cebu City Hall si Coach Aldrin. (BANAT NEWS)