DSWD nakadawat og P500M nga budget gikan sa DBM

CEBU, Philippines — Nakadawat ang Department of Social Welfare and Development (DSWD) og P500 milyones nga alokasyon gikan sa Department of Budget and Management (DBM) alang sa pagtukod sa mga rehiyonal nga buhatan alang sa Inclusive Sustainable Peace and Special Concerns (ISPSC) nga cluster.

Si DSWD Secretary Rex Gatchalian nagkanayon nga ubos ni Undersecretary Alan Tanjusay, ang himuong mga buhatan nagtumong sa pagdumala sa reintegration sa non-state armed groups ug kanhi mga rebelde.

Atol sa budget hearing sa gi-propose nga 2025 budget sa DSWD, gibutyag ni Gatchalian ngadto sa Appropriations Committee nga ang ahensya nagpadayon sa pagpauswag sa mga programa ug serbisyo alang sa kalinaw ug kalamboan, ilabi na sa pagdumala sa mga kaso sa mga kanhi rebelde ug mga na-decommission nga mga combatants.

Matud niya nga padayon silang nihatag og pinansyal nga suporta sa mga rebel returnees apan walay nagdumala sa mga kaso niining mga indibidwal, busa aron ma-solusyonan ang kal-ang naghimo sila og bag-ong after case management nga mekanismo.

Ang pilot program una nga ipatuman sa Bangsamoro Autonomous Region in Muslim Mindanao (BARMM) aron masiguro nga hustong mabantayan ang mga na-decommissioned ug nabayran nga mga manggugubat.

Plano usab sa DSWD nga mo-deploy og 400 ka mga social worker ilabina sa pagdumala sa mga kaso sa mga rebel returnees isip kabahin niini nga inisyatiba.

Kini nga case management ubos sa Peace and Development Buong Bansa Mapayapa (PDBBM) nga programa sa ahensya nga nagtinguha sa pagsuporta sa kahimtang ug panginabuhi sa mga indibidwal nga naapektuhan sa armado nga panagbangi. (BANAT NEWS)