Muslim community giawhag pagtabang sa kapolisan

CEBU, Philippines —  Nakigtagbo sa Muslim community sa Dakbayan sa Lapu-Lapu ang kapolisan  sa Lapulapu City Police Station 4 nga gipangulohan ni Police Major Judith Besas ug mga opisyal sa Barangay Basak alang sa pagpalig-on sa seguridad sa barangay.

Gibisita usab sa mga pulis ang mosque alang sa laing dialogue nga naglambigit sa tanang panginahanglan ug mga pangutana sa mga nanimuyo nga mga Muslim sa maong barangay.

Gihangyo sab sila sa kapolisan ug sa barangay nga tabangan sila sa pagpakgang sa mga krimen  ilabi na kun dunay silay mga sakop  nga moapil sa ilegal nga kalihokan ilabi na sa pagbaligya sa ilegal nga drugas.

Dugang sa hangyo kanila ang pagtabang sa pagsanta sa terorismo pinaagi sa pagtaho gilayon kun adunay bag-ong moabot sa ilang lugar nga gikan sa ubang probinsya ilabi sa Mindanao nga kadudahan ang mga kalihokan.

Matud  ni Besas nga usa sa tumong sa ilang pakigtagbo mao ang pagpalig-on sa ilang relasyon aron makab-ot ang hapsay ug malinawon ang ilang  kahimtang ug pagpuyo.

"Our goal is to foster open communication, enhance understanding, and build trust between the local authorities and the Muslim residents. By addressing these concerns, the goal was to create a safer environment and strengthen the relationships between the community, law enforcement and the local government," nagkanayon si Besas.

Sa pikas bahin, nipagawas og mga pahimangno ang kapolisan sa Dakbayan sa Talisay labot sa mga angay buhaton aron malikayan ang pagpanulis ug kawat.

Usa niini ang pagtutok sa mga negosyante sa seguridad sa ilang establisamento, pasug-an gyud ang entrance ug exit lakip na ang parking area ug pagmuntar og alarm system ug pagkuha og gwardiya.

Una niini, si Police Lt. Col. Epream Paguyod, hepe sa kapolisan nibutyag nga ilang gihingusgan ang ilang pagpatrolya sa banko, jewelry pawnshops ug uban pa.

Ang paghimo og random checkpoint ang ilang kanunay nga gihimo.

Ang tulo ka police community precinct gisangonan nga manawag ug mag-monitor sa mga business establishment matag karon ug unya. (BANAT NEWS)