Pag-ilis sa Senior ID, fake news —OSCA

CEBU, Philippines — Mopahigayon og imbestigasyon ang Office of the Senior Citizens Affairs (OSCA) aron masuta kun kinsa ang nagpaluyo sa pagpakatap og “fake news” kababin sa bag-ong polisiya nga matud pa nga nagkinahanglan nga ilisan ang mga ID sa mga senior citizen sa dakbayan.

Gibutyag ni OSCA Administrator Rey Abesia nga buot nga pa-imbestigaran sa pangu sa OSCA nga si Atty. Homer Cabaral kun kinsa maong nagpakatap sa maong fake news.

Tungod sa mikatap nga sayop nga mensahe, midagsa ang dul-an sa 700 ka mga rehistradong senior citizen sa ilang buhatan ning semanaha kay magpailis sa ilang mga ID kay nabalaka silang di sila makadawat sa ilang financial assistance karong Septiyembre 7, 2024.

“Giklaro lang namo nga dili gyud na tinuod nga gi-require namo ang mga senior citizens nga magpa-ilis sa ilang ID para maka-claim sila sa ilang assistance. Amo gihapon i-honor ang ilang ID basta mabasa pa og dili hanap ang nakabutang,” pagklaro ni Abesia.

Kasamtangang gisuspenso sa OSCA ang pagproseso sa pag-ilis sa ID sukad kagahapong adlawa tungod sa kalit nga pagdaghan sa mga nagpag-ilis sa ilang ID.

Gitug-an sab ni Abesia nga naguba sab ang ilang ID printer tungod sa kadaghan nga nang-apply nga magkuha og bag-ong ID.

Sa laing bahin, si Abesia niingon nga ang pagapud-apud sa ikatulong tranche sa financial assistance alang sa mga senior citizens pagahimuon ngadto sa mga barangay karong Septyembre 7 hangtod na sa Septyembre 10.

Ang mga senior citizen nga dili makakuha sa maong tabang pinansyal atol sa barangay distribution, mamahimo gihapon nga mokuha niini sa buhatan sa OSCA sugod Septyembre 11. — IBM BANAT NEWS