DVMF mideklarar nga wala nay bag-ong kaso sa ASF
CEBU, Philippines — Gideklarar sa Department of Veterinary Medicine and Fisheries (DVMF) nga wala nay bag-ong natala nga kaso sa ASF sa Barangay Bonbon sukad pa niadtong miaging buwan.
Matud pa sa city veterinarian nga si Dr. Alice Utlang nga wala nay positibong kaso sa ASF sa Bonbon sukad nga gipatuman sa DVMF ang estrikto nga biosecurity measures aron malikayan ang pagkatap sa maong sakit sa kahayupan ngadto sa laing barangay.
Base sa datus sa DVMF, pito ka mga binuhing baboy ang namatay niadtong Hulyo 14 human nagpositibo sa ASF.
Aron masolusyonan ang maong problema, gipatuman sa DVMF ang mga lakang sama sa adlaw-adlaw nga pagkolekta sa sample sa dugo ug regular nga disinfection sa mga swine farm nga nahimutang sa maong barangay.
Samtang dul-an 80 ka farmers ang nikuha na og livestock insurance sa ilang mga binuhi nga baboy pinaagi sa pag-abag sa City Agriculture Department (CAD).
“Gidasig nato atong mga farmers karun nga magpa-insure sa ilang mga hayopan kay dili nato matag-an gyud nga naay mga ing-ana nga mahitabo. At least, naa silay mapaabot,” suma pa ni Elyn Marie Burlaos, CAD agriculturist.
Ang mga interesado nga mga farmers mahimong mobisita sa CAD office sa Cebu City Satellite Office alang sa dugang impormasyon kun unsaon pag-avail sa livestock insurance. (BANAT NEWS)
- Latest
