Health office sa Talisay nag-misting sa eskwelahan
CEBU, Philippines — Ang Dakbayan sa Talisay nipahigayon og misting diha sa Talisay City Science High School kagahapon aron sa pagsiguro nga walay lamok nga makahatag og sakit sa ilang mga tinun-an.
Kini ang gibutyag ni Froilan Delos Santos, principal sa TCSHS.
Ang maong tunghaan duol kini sa kanal ug anaay mga tanom ug kasagingan sa likod niini ug makasinati pa gayud og lim-aw sa higayon nga adunay pag-uwan-uwan.
Matud ni Delos Santos nga nihangyo sila sa Talisay City Health Office sa pagpahigayon og misting operation.
Gibutyag ni Delos Santos nga matag bukas sa klase ug pagtak-op sa school year naandan na nila nga mopahigayon og misting.
Tumong niini aron sa pagsiguro nga walay usa sa ilang mga tinun-an ang masakit og dengue human sa nilabay nga school year nakatala sila og usa ngadto sa duha ka kaso sa dengue.
Gipahibalo ni Delos Santos nga kanunay ang ilang pagtudlo sa mga tinun-an sa kamahinungdanon sa pagmentinar nga limpiyo ang ilang dapit ilabi na sa ilang mga classroom.
Dugang ni Delos Santos nga niawhag sila sa mga ginikanan sa higayon nga adunay mga hilanat ang ilang mga anak nga mopahibalo dayon aron masusi kini kong pila na ka adlaw nga nagsakit ang bata. (BANAT NEWS)
- Latest
