Security forces ipakatap sa Pasigarbo sa Sugbo karong Domingo
CEBU, Philippines — Nagtambayayong ang nagkalain-laing ahensiya sa gobiyerno aron hugot nga seguridad ang mapatuman sa Pasigarbo sa Sugbo 2024 nga ipahigayon karong Domingo.
Nagkanayon si Police Lieutenant Colonel Gerard Ace Pelare, tigpamaba sa Police Regional Office-7 nga 1,700 ka security forces ang magbantay sa maong kalihokan.
Gilangkuban kini sa mga personnel sa Philippine National Police, Armed Forces of the Philippines, Bureau of Fire Protection, Philippine Coast Guard, Office of the Civil Defense ug uban pang ahensiya sa gobiyerno.
Niadtong Miyerkules ang mga nagkalain-laing government agencies nihimo sa ilang final security briefing diha sa Kapitolyo.
Matud ni Pelare nga na-finalize na nila ang ilahang himuong security measures sa Pasigarbo sa Sugbo 2024.
Gipangandaman sa PRO-7 ang pag-abot sa mga dagkong bisita sa maong kalihokan apil ang mga delegado gikan sa nasud nga Russia.
“Our assurance to the public as just like in previous events Pasigarbo, Sinulog, Palarong Pambansa we are prepared for this and this is a comprehensive effort among all security agencies in Central Visayas”, matud ni Pelare.
Walay na-monitor nga hulga ang PRO-7 apan dili gihapon sila mokompiyansa hinungdan nga anaa sila’y contingency planning ug gitan-aw usab nila ang posibleng scenario nga motumaw atol sa kalihokan.
Nasayran nga 50 ka contingents ang niapil sa Pasigarbo sa Sugbo 2024 diin lakip na niini ang mga nidaog sa niaging Sinulog ug kagahapon nagsugod na og practice ang mga contigent.
Nunot niini, maabi-abihon nga gidawat sa Don Vicente Rama Memorial Elementary School ang delegation sa Lungsod sa Asturias diin nangabot kini kagahapon sa udto pinangulohan ni Mayor Dana Andrew Dumdum.
Matud ni Morishka Nicole Uy sa DVRMES nga ang ilang tunghaan maoy gamiton isip billeting area sa Lungsod sa Asturias ug San Fernando.
Gibutyag ni Uy nga 300 ka tawo ang gikan sa Lungsod sa Asturias ang ilang gi- accommodate.
Ang mga tinun-an sa mga tunghaan nga gigamit karon nga billeting area nagpaubos usa sa module nga klase. (BANAT NEWS)
- Latest
