Tulo sa mga suspetsado sa tulis sa pawnshops gikasohan na
CEBU, Philippines — Gipasakaan na og kasong robbery in band ang tulo sa siyam ka suspetsado sa pagpanulis sa duha ka tindahan og alahas diha sa F. Calderon Street, Barangay Ermita, Siyudad sa Sugbo kagahapon sa buntag, Agosto 21, 2024 diha sa Cebu City Prosecutor's Office.
Kini subay sa mga ebidensiya nga nakuha sa mga otoridad ug testimoniya sa walo ka testigo nga gipresenta nila ngadto sa piskaliya kagahapon.
Ang tulo nga gipasakaan og kaso mao si alyas “Marcial”, drayber sa Mitsubishi Adventure nga gigamit isip usa sa mga getaway vehicles sa mga tulisan ug na-recover sa kapolisan sa Barangay Pakaan, Dakbayan sa Mandaue, alyas “Gab” kinsa giingong nag- dispose sa armas ug ang PNP personnel nga nagranggo og Police Master Sergeant nga maoy tag-iya sa sakyanan.
Gipasabot ni Police Colonel Antonietto Cañete, acting city director sa Cebu City Police Office(CCPO) nga wala una nila giapil sa gipasakaan og kaso ang nagsilbing lookout sa pagpanulis nga si alyas “Mik-Mik” tungod kay gipasusi una nila sa Regional Anti-Cybercrime Unit (RACU)-7ang footage sa closed circuit televison nga ilang nakuha isip ebidensya sa partisipasyon niini sa krimen.
Si Acting Cebu City Mayor Raymond Alvin Garcia usa sa mga nangunay sa pagpasaka og kaso.
Gihangop ni Garcia ang paspas nga imbestigasyon sa kapolisan ingon man ang pagpasaka og kaso batok sa mga responsable sa krimen.
Si Garcia nagkanayon nga nagtagbaw siya sa gipakitang kalamboan sa kapolisan ubos sa liderato ni Cañete ug gibutyag niya nga usa ang maong opisyal sa iyahang gikonsiderar nga himuong permanenteng hepe sa kapolisan sa Siyudad sa Sugbo. (BANAT NEWS)
- Latest
