Sinulog 2025 ipahigayon sa Cebu City Sports Center
CEBU, Philippines — Ang Sinulog 2025 ipahigayon diha sa Cebu City Sports Center kini ang gipahibalo ni Acting Cebu City Mayor Raymond Alvin Garcia atol sa gipahigayon nga 1Cebu Expo diha sa Mounting Wing Atrium sa SM Seaside City Cebu kagahapon sa buntag.
Ang maong kalihokan gitambongan nila ni Cebu Governor Gwendolyn Garcia, Board Member Glenn Soco, Lapu-Lapu City Mayor Junard “Ahong” Chan ug uban pa.
Ang maong kalihokan nagpakita sa mga maanindot nga produkto sa 44 ka lungsod, unom ka component city ug tulo ka highly urbanized city.
Si Garcia nagkanayon nga usa ka dakong garbo nga ipahigayon ang Pasigarbo sa Sugbo sa Dakbayan sa Sugbo tungod kay dili lang kini magpakita sa kaanindot sa Probinsiya sa Sugbo gipakita usab niini ang usa ka hiniusa nga One Cebu Island Province.
Matud ni Garcia nga naghinam-hinam siya nga mosaksi sa Pasigarbo sa Sugbo tungod kay usa kini ka learning experience sa siyudad alang sa pagpahigayon sa Sinulog 2025 diha gihapon sa Cebu City Sports Center.
Gipadayag ni Garcia nga nakigtagbo na siya sa iyang team aron mahan-ay nila ang Pasigarbo ilabi na kalabot sa pagpahimutangan sa mga props nga gikan sa mga nagkadaiyang dapit nga gamiton atol sa Pasigarbo sa Sugbo.
Si Garcia niawhag sa gobernador pinaagi sa pag-ingon nga “Gov show us the way” tungod kay mao kini karon ang ilang sukaran alang sa pagpahigayon sa Sinulog diha sa CCSC sa sunod tuig. (BANAT NEWS)
- Latest
