Peke nga cellphone accessories gisakmit sa NBI

CEBU, Philippines — Gibana-banang mokabat sa dul-an sa P1 milyon nga balor sa mga counterfeit nga produkto sa usa ka brand sa cellphone ug accessories ang nasakmit sa National Bureau of Investigation-National Capital Region gikat sa upat ka tindahan og gadgets ug accessories nga nahimutang diha sa Colon Street, Dakbayan sa Sugbo kagahapon sa buntag.

Dungan nga gironda sa mga operatiba ang upat ka tindahan sa cellular phones, uban nga mga gadgets ug cellphone accessories dala ang search warrants nga giisyu sa Regional Trial Court National Capital Judicial Region sa Branch 46 ngadto sa Manila.

Kini kalabot sa kalapasan sa Section 155.1 in relation sa Section 170 sa Akta Republika 8293 kun “Trademark Infringement”.

Atol sa pagsusi mga kinarton ug mga gisulod sa dakong plastik sa mga peke nga accessories sa usa ka brand nga naka-display ug stocks diha sa ilang mga bodega ang gipangsakmit .

Matud ni Special Investigator V Rafael Arcangel, NBI- Central Office nga ang ilang buhatan nakadawat of reklamo gikan sa brand representatives batok sa pagpakatap sa peke nga mga kagamitan sa maong mga tindahan hinungdan nga nagpahigayon sila og surveillance, test buy ug dihang nasuta nila nga positibo nipahigayon  dayon sila og operasyon.

Si Arcangel nagkanayon nga confiscation lang ang ilahang gihimo base sa search warrant ug walay dakop tungod kay wala may entrapment.

Gibutyag sa NBI-NCR nga makadaot sa publiko ang mga peke hinungdan padayon ang ilang paggukod sa mga nagpakatap sa mga counterfeit kini subay usab sa mando sa ilang director nga si kanhi judge Jaime Santiago.

Matud sa brand representative nga aduna pa sila’y mga tindahan nga gisusi apan ang upat nga gironda ang nasuta nga daghan ug lantada ang pagpamaligya sa mga peke nga produkto nga gibutangan og pangalan sa ilang brand.

Gibutyag sa maong brand representative nga ang maong mga peke nga produkto nakadaot kini sa maong brand ilabi na bati kaayo ang quality sa maong peke nga gipangbaligya.

Ang usa sa mga manager sa gironda nga tindahan nibutyag nga wala siya masayod nga peke ang ilang gipamaligya ug nagtuo siya nga mga original.

Ang mga peke nga baligya gilangkuban sa charger nga mapalit lang sa P120 apan ang original anaa sa P1,200 o P1,500 ang presyo, batteries, adapter ug uban pa.

Nasayran nga ang mga nasakmit nga produkto dalhon kini ngadto sa kaulohan alang sa documentation aron mahimong ebidensya alang sa pagpasaka og kaso sa dili pa kini panggub-on. (BANAT NEWS)