Nakigpinusilay

CEBU, Philippines — Patay ang usa ka lalake human giingong nakigpinusilay sa kapulisan sa Lungsod sa Argao nga modakop unta sa iyang ig-agaw kagahapon sa alas-5 sa buntag sa Barangay Jampang, Lungsod sa Argao.

Ang namatay mao si Jay Rodel delos Reyes Comaling, samtang nakaikyas ang ig-agaw niining sila si Joel ug igsuong si Jonathan Comaling nga maoy dakpunon tungod sa kasong kalapasan sa Republic Act 10591 o Cyber Crime Law subay sa warrant of arrest nga gi-issue sa Regional Trial Court Branch 63, 7th Judicial Region.

Apan gikatahong nakabantay kini sa pagabot sa mga polis ug giunhan sa pagpusil ang mga otoridad dalang ikyas sakay og motorsiklo.

Human sa butobuto, nahagba na si Jay Rodel Comaling ug patay na pagabot sa Isidro C. Kintanar Memorial Hospital.  Nakuha gikan niya ang KG-9 submachine pistol samtang usa ka granadang wala nakabuto ang nakita sa lugar diin nahitabo ang engkwentro.

Nagkanayon si Police Major Janus Giangan, hepe sa Argao Police Station nga si Jonathan maoy target sa warrant of arrest apan suspek sab kini sa murder case, samtang ang namatay giingong hitman ug tulisan ug magsige matod pa kini pabuto og armas sa lugar.

Sa laing bahin nadakpan sa Labangon Police Station 10 pinangulohan ni Police Major Eraño Regidor ang usa ka Ruben Panugaling Geloca, 48, nga giingong gireklamong magsige og sukbit-sukbit og armas diha sa Sitio Bugnay 2, Barangay Labangon, siyudad sa Sugbo, Lunes sa gabii.

Ang pagsikop kaniya pinaagi sa search warrant gikan sa Regional Trial Court Branch 74, Cebu City tungod sa paghupot og armas. Sigon sab ni Regidor si Geloga bag-o pang nakagawas sa prisuhan tungod sa kasong kalapasan sa Section 5 ug 11, Article II sa Republic Act 9165.

Nasakmit gikan niya ang usa ka kalibre .38 nga revolver nga dunay mga bala. – IBM BANAT NEWS