Garcia: Lig-on ang Probinsya sa Sugbu

CEBU, Philippines — “The state of the Province is strong. In fact, it is super strong”. Mao kini ang deklarasyon ni Gobernador Gwendolyn Garcia atol sa iyang State of the Province Address (SOPA) kagabii diin misaksi ang nagkadaiyang opisyal ug bisita sa Sugbo apil na ang delegasyon gikan sa Russia.

Ang gobernador mipresentar sa kalampusan sa iyang administrasyon sukad nga siya nilingkod balik pagka gobernadora sa lalawigan sa Sugbo gikan sa panglawas, turismo, tax collection, agrikultura, imprastraktura ug uban pa nga programa ug proyekto.

Matud ni Garcia tungod sa subsob nga koleksyon sa buwis sa kapitolyo ang tax collection sa Probinsya miabot na sa P1.1 bilyon, adunay pagsaka og 6% . Samtang ang koleksyon sa ubang charges misaka pud og 77% o 180 million.

Ang Probinsya sa Sugbo nagpabilin pud nga pinakaadunahang probinsya lukop nasud pinaagi sa P309.8 billion nga net asset niini.

Apan si Garcia nagkanayon nga ang titulo isip pinaka adunahan nga probinsya aduna pud hagit. Una, kinahanglan nga mapreserbar ang asset sa probinsya aron dili kini mokunhod; ikaduha kinahanglan nga lig-on ang financial situation sa Probinsya alang sa konstituwente niini ug ikatulo kinahanglan mapadayon ang pagsaka sa assets sa Proibnsya alang sa umaabot nga henerasyon.

Sa imprastraktura, hapit na mahuman pagkongkreto ang 890 kilometro nga provincial road ug nakatukod na pud 219 kilometrong barangay roads, 19  sa 21 ka taytayan gikan sa Carcar, Barili, Boljoon, Asturias, Tuburan, Daanbantayan, Ginatilan ug ang mga lungsod sa Camotes Island sama sa Poro,  San Francisco, Tudela ug Pilar ang nakompleto,  47 ka barangay halls, 13 ka school buildings, 12 ka daycare centers ug walo ka hospital buildings ang natukod sa Kapitolyo.

Sa suplay sa tubig, padayong gitrabaho ang P2 bilyones nga bulk water projects sa 12 ka munisipyo diin makabenepisyo niini ang 60, 000 ka panimalay.

Nagmalampuson sab ang “pro-poor” nga mga programa sama sa Sugbusog, Sugbo Kahanas, Sugbo Negosyo ug uban pa.

Sukad pud 2022, moabot sa 11, 600 ka mga scholars ang migradwar ug nakadawat og national certificates ug toolkits sa Sugbo Kahanas.

 Pag-abot sa edukasyon si Garcia nagkanayon nga migahin og P400 million ang Kapitolyo alang sa 966, 481 ka mga tinun-an gikan sa kinder hangtod Grade 12.

Si Garcia nagkanayon nga mopadayon ang Kapitolyo pagpatuman sa mga programa ug proyekto nga makabenipisyo sa mga konstituwente niini sa tibook lalawigan. -- IBM  BANAT NEWS