Pagtukod sa “transitional housing” i-bidding karong sunod buwan

CEBU, Philippines — Tinguha ni acting Cebu City Mayor Raymond Alvin Garcia nga ma-bidding na karong Septiyembre ang “transitional housing” nga tukoron alang sa mga apektado sa paghawan sa tulo ka metros nga easement daplin sa mga sapa ingon man kadtong nagpuyo sa pribadong mga luna.

Nasayran aprobado na daan sa konseho sa dakbayan ang maong tinguha sa niaging tuig. Matud pa ni Garcia nga aron hingpit nga mapatuman ang massive clearing operations sa mga makalapas sa three-meter easement, kinahanglan una nga tukuron ang transitional housing nga magsilbing temporaryo nga kapuy-an sa mga apektadong indibidwal.

Gitug-an ni Garcia nga dunay pundo nga P600 milyones ang kagamhanan alang sa mga model houses apan han-ayon pa ang i-bid ngadto sa mga contractor.

Wala pa siya masayod kung pila gyud ang magasto sa kagamhanan sa pagtukod sa mga housing units apan gitrabaho na kung pila ang makiangayon nga balor sa kada usa.

Gibana-banang anaa sa 400 ka mga unit ang tukoron nga adunay dili momenos 15 square meters ang gidak-on.

Duha ka luna ang gitan-aw karon nga tukuran sa maong mga transitional houses nga anaa nahimutang sa South Road Properties ug sa Block 27 sa North Reclamation Area.

Sa laing bahin, “on hold” o gihunong una ang re-bidding alang sa bag-ong kontraktor sa pagtiwas sa socialized housing medium-rise building (MRB) nga nahimutang sa Barangay Lorega San Miguel nga maoy permanente nga kapuy-an sa mga informal settler families (ISF) sa dakbayan.

Gikataho nga na-terminate na ang kontrata sa MRB sa Lorega. Matud pa ni Garcia nga ipadayun lang ang re-bidding kon ma-reconcile na ang kantidad sa kwarta nga adunay kalabutan sa MRB. MEL BANAT NEWS