Duha ka barko sa PCG gibanggaan sa CCG

CEBU, Philippines — Giakusahan sa Pilipinas ang Chinese Coast Guard nga intensyonal nga nibangga sa duh aka barko sa Philippine Coastguard diha sa Escoda Shoal sa West Philippine Sea kagahapon sa kaadlawon, adlaw nga Lunes, Agusto 19,2024.

Nangalumping ug nabuslot ang mga kilid sa duha ka barko sa PCG  nga BRP Cape Engaño ug BRP Bagacay samtang ang duha padung mag-supply sa mga tropa sa Pilipinas diha sa Patag ug Lawak Islands duol sa Escoda Shoal sumala pa ni Jonathan Malaya, tigpamaba sa National Task Force for the West Philippine Sea.

Ang unang pagbangga nahitabo alas 3:24 sa kaadlawon kagahapon u gang gibanggaan mao ang BRP Cape Engaño nga nalumping ug nabuslot ang kilid niini dihang gibanggaan og Chinese Coastguard nga barko.

Paglabay sa pipila ka minutos, alas 3:40 sa kaadlawon sunod gibanggaan ang BRP Bagacay  kaduha ka higayon sa laing Chinese Coastguard nga barko apan minor damage lang ang naangkon niini.

Ang insidente maoy pinakabag-o sa daghang mga kaso sa pagpang-harass sa China sa mga barko sa Pilipinas. Ang lugar layo ra sa Ayungin Shoal nga diin nahitabop komprontasyon tali sa mga sakop sa Philippine Navy nga nag-supply sa mga tropa sa BRP Sierra Madre niadtong Hunyo 17, 2024. 

Ang intensyonal nga pagbangga sa CCG sa mga barko sa PCG nahitabo 20 nautical miles lang gikan sa Escoda Shoal nga gibanabang 140 kilometros sa kasadpang bahin sa Palawan nga nasulod sa  exclusive economic zone sa Pilipinas.

"Despite these incidents, both PCG vessels remain committed to and shall proceed with their mission of delivering essential supplies to personnel stationed on Patag and Lawak Islands," matud pang Malaya.

"The PCG stands firm in its responsibility to ensure the safety and security of our maritime domain while addressing any threats to our national interests," dugang pa niya.

Siya midugang nga nagpailob ug nagpugong ang PCG subay sa pagtahod sa United Nations Convention on the Law of the Sea (UNCLOS) ug ubang pang international laws aron dili modako ang kasamok.

Apan ang Chinese state media sayo palang sa buntag kagahapon, mipagawas og pamahayag nga gituyoan og bangga sa mga barko sa Pilipinas ang ilang mga barko bisan makadaghang higayon nila kining giabog palayo sa lugar.

Ang tigpamaba sa CCG nga si Gan Yu miingon nga ilegal nga nisulod ang PCG sa maong dapit nga ilang giangkong ilaha. Gipasanginlan sab niini ang Pilipinas maoy nagpasiugda sa gubot.

Gani niadtong nakalabay nga mga adlaw, ang China miduso og diplomatic protest batok sa presensiya sa pinakadakong barko sa PCG, ang BRP Teresa Magbanua diha sa Escoda Shoal.

Ang China pabiling nagmagahi ug wala motahod sa 2016 Arbitral Ruling nga nagimbalido sa ilang pangangkon sa WPS, nga ang Pilipinas maoy dunay ekslusibong katungod sa maong lugar ubos sa UNCLOS.