“I love Lusaran” sa dam gipapapas sa DENR

CEBU, Philippines — Walay pagtugot sa protected area management board (PAMB) sa Department of Environment and Natural Resources ang pagbutang og pintal sa mga bato sa Lusaran Dam nga sakop sa bukirang barangay sa dakbayan sa Sugbo busa gipatangtang kini.

Mabulokon  unta nga talan-awon nga adunay nakasulat nga “I love Lusaran” nga murag bangaw o rainbow nga mga bato ang nakapasamot sa pagdani sa mga tawo nga nanuroy sa lugar. Niadtong nakalabay nga Marso karong tuiga gimugna ang Lusaran dam beautification program ni Konsehal Jimmy Marikit kinsa maoy chairman sa Committee on Tourism sa Barangay Lusaran sa tinguha nga makadani pa og dugang mga turista.

Apan nabutang karon sa kontrobersya human gibuyag sila sa DENR kay wala kini pagtugot gikan kanila. Matud pa nga kinahanglan og permit ang sama niini nga proyekto kay ang Lusaran nasulod sa mga protected areas sa siyudad.

Matud pa ni Charlie Fabre , OIC Assistant Regional Director sa DENR-7, mahinungdanon kaayo nga adunay koordinasyon sa wala pa ipatuman ang programa aron masayran kun haum ba kini sa kinaiyahan o makaguba sa naandan nga talan-awon sa kalikopan.

Nangayo og pasaylo si Marikit ug gisugdan na nila ang mano-manong pagtangtang sa pintal gamit ang brush. (BANAT NEWS)