Ikanapulo nga kaso Monkey Pox natala sa DOH
CEBU, Philippines — Usa ka dugang kaso sa Monkey Pox (mpox) ang natala sa Pilipinas sumala pa sa Department of Health (DOH) kaniadtong Domingo, Agosto 18, 2024. Mao kini ang ikanapulo nga laboratory-confirmed nga kaso sa mpox sa nasud.
Ang kataposang kaso natala niadtong Disyembre 2023, ang mga natakboyan niini gi-isolate, gi-atiman, ug naka-recover na sumala pa sa DOH.
Ang bag-ong kaso naglambigit sa 33 anyos nga lalaki nga walay travel history sa gawas sa Pilipinas apan adunay close o intimate nga kontak og langyaw tulo ka semana sa wala pa magsugod ang sintomas.
Ang mga sintomas niini mao ang kapin usa ka semanang hilanat, ug paglabay sa upat ka adlaw gisundan og rashes sa nawong, likod, liog, trunk, groin, ingon man mga palad ug lapalapa. Manakit sab ang mga lusay, ulo, luya ang lawas ug pamaol.
Ang kaso gisusi sa usa ka ospital sa gobyerno, diin ang mga specimen gikan sa skin lesions ug gi-test gamit ang real-time polymerase chain reaction (PCR) test, nga nagpamatuod sa positibong resulta sa Monkeypox viral DNA.
Si DOH Secretary Teodoro J. Herbosa miingon nga mahimo ra nga malikayan ang maong sakit ug makontrol ang pagkuyanap niini.
“We can avoid mpox. Mpox is transmitted through close, intimate contact, and also the materials used by people who have mpox. Keeping our hands clean with soap and water, or with alcohol-based sanitizers will help," matud ni Herbosa.
Gipaninguha sa DOH nga mapaspas ang testing process sa mga pasyente ug kinahanglan lang magpuyo lang kini sa balay aron di makatakod sa uban.
Ang mpox gideklara sa World Health Organization (WHO) nga Public Health Emergency of International Concern (PHEIC) niadtong Agosto 14, 2024. (BANAT NEWS)
- Latest
